West Bengal CM: मोठी बातमी! पश्चिम बंगालला मिळाले नवे मुख्यमंत्री, अमित शहांनी 'या' नेत्याच्या हाती सोपवली धुरा

• सुवेंदू अधिकारी पश्चिम बंगालचे नवे मुख्यमंत्री

• अमित शहा यांनी केली सुवेंदू अधिकारी यांच्या नावाची घोषणा

• उद्या सकाळी ११ वाजता होणार शपथविधी

पश्चिम बंगालमध्ये भाजपकडून सत्ता स्थापनेच्या हालचालींना वेग आला आहे. सुवेंदू अधिकारी पश्चिम बंगालचे मुख्यमंत्री झाले. केंद्रीय गृहमंत्री अमित शहा यांच्या उपस्थितीत कोलकातामध्ये पार पडलेल्या भाजप विधिमंडळ पक्षाच्या बैठकीमध्ये त्यांच्या नावावर शिक्कामोर्तब करण्यात आला. या बैठकीला भाजपचे सर्व नवनिर्वाचित २०६ आमदार उपस्थित होते. उद्या सकाळी ११ वाजता सुवेंदू अधिकारी मुख्यमंत्रिपदाची शपथ घेणार आहेत.

कोलकातामध्ये भाजप विधिमंडळ पक्षाची बैठक पार पडली. या बैठकीमध्ये अमित शहा यांनी सुवेंदू अधिकारी यांची पक्षाचे नेते म्हणून निवड केली. तसंच ते पश्चिम बंगालचे नवे मुख्यमंत्री असतील अशी घोषणा देखील केली. सुवेंदू अधिकारी उद्या सकाळी ११ वाजता कोलकाताच्या ऐतिहासिक ब्रिगेड परेड ग्राऊंडवर मुख्यमंत्रिपदाची शपथ घेतील.

९ मे हा दिवस पश्चिम बंगालसाठी खास दिवस राहिल. राज्यातील पहिल्या भाजप सरकारचा शपथविध सोहळा पार पडेल. या शपथविधी सोहळ्याला पंतप्रधान नरेंद्र मोदी आणि केंद्री गृहमंत्री अमित शहा यांच्यासह अनेक राज्यांचे मुख्यमंत्री उपस्थित राहणार आहेत. सुवेंदू अधिकारी यांनी पश्चिम बंगालच्या माजी मुख्यमंत्री ममता बॅनर्जी यांचा पराभव केला. भवानीपूर या ममता बॅनर्जी यांच्या बालेकिल्ल्यातच सुवेंदू अधिकारी यांनी त्यांचा पराभव केला.

दरम्यान, पश्चिम बंगालचे राज्यपाल आर. एन.रवी यांनी ७ मे रोजी विधानसभा बरखास्त केली. कोलकाता गॅझेटमध्ये प्रसिद्ध झालेल्या अधिकृत अधिसूचनेनुसार, पश्चिम बंगाल विधानसभा निवडणुकीत भारतीय जनता पक्षाच्या प्रचंड विजयानंतर हे विसर्जन करण्यात आले. विधानसभा बरखास्त केल्यानंतर दुसऱ्याच दिवशी भाजपकडून सुवेंदू अधिकारी यांच्या नावाची मुख्यमंत्रिपदावर निवड करण्यात आली. अमित शहा यांनी त्यांच्या नावाची अधिकृत घोषणा केली. थोड्याच वेळात सुवेंदू अधिकारी राज्यपालांची भेट घेणार आहेत.