Valentine Day Tragedy : व्हॅलेंटाइन डेला प्रेमाचा भयानक शेवट; बंद कारमध्ये आढळले तरुण-तरुणीचे मृतदेह

व्हॅलेंटाइन डेच्या दिवशी धक्कादायक घटना घडली आहे. एका जोडप्याने व्हॅलेंटाइन डेच्या दिवशी आत्महत्या केली आहे. बॉयफ्रेंडने आधी गर्लफ्रेंडवर गोळी झाडली. त्यानंतर बॉयफ्रेंडने स्वत:वर गोळी झाडून आयुष्य संपवलं. पोलिसांनी घटनास्थळी पोहोचून रक्ताच्या थारोळ्यात पडलेल्या दोघांना रुग्णालयात दाखल केलं. परंतु डॉक्टरांनी दोघांना मृत घोषित केलं. पोलिसांनी या प्रकरणाचा जलदगतीने तपास सुरू केला आहे.

व्हॅलेंटाइन डेच्या दिवशी उत्तर प्रदेशच्या नोएडामध्ये जोडप्याने आत्महत्या केल्याने खळबळ उडाली आहे. दोघांचे मृतदेह एका कारमध्ये आढळले आहेत. नोएडा येथील सेक्टर ३९ मधील सेक्टर १०७ रोड परिसरात ही घटना घडली. पोलिसांना माहिती मिळताच त्यांनी घटनास्थळी धाव घेतली. दोघेही त्रिलोकपुरी येथील रहिवासी आहेत.

पोलिसांनी दिलेल्या माहितीनुसार, मृत तरुणाचं नाव हे सुमित आहे. तो दिल्लीच्या त्रिलोकपुरीमध्ये राहत होता. तर मृत तरुणीचं नाव रेखा आहे. ती नोएडाच्या सेक्टर ५८ सेक्टरमध्ये राहत होती. दोघे कालपासून बेपत्ता होते. दोघे जण बेपत्ता झाल्याची तक्रार त्यांच्या कुटुंबीयांनी पोलिसांत दिली होती.

मृत्यूआधी सुमितने रेखाला एक मेसेज केला होता. त्याने म्हटलं होतं की, 'मी आत्महत्या करायला जात आहे. त्यास रेखा जबाबदार आहे. १५ वर्षांपासून एकत्र राहणाऱ्या रेखाने लग्नाचं वचन दिलं होतं. परंतु ती दुसऱ्या मुलासोबत लग्न करत आहे. यामुळे मी आत्महत्या करत आहे. कारण रेखाने मला धोका दिला आहे. मी आता आत्महत्या करत आहे'.

पोलिसांनी दोघांचा मृतदेह ताब्यात घेतला आहे. त्यानंतर शवविच्छेदनासाठी पाठवण्यात आला आहे. फॉरेन्सिक रिपोर्टनंतर दोघांच्या मृत्यूचं कारण समोर येईल. प्राथमिक तपासानुसार तरुणाने आत्महत्या केल्याचे दिसत आहे.