भीषण अपघाताचा थरार; ४ पोलीस कर्मचाऱ्यांसह ५ जणांचा जागीच मृत्यू

उत्तर प्रदेशच्या जालौनहून हरियाणाच्या नूंहमध्ये अपहरण प्रकरणात धाड टाकायला गेलेल्या पोलिसांच्या पथकाच्या वाहनाचा अपघाताची घटना घडली. या दुर्घटनेत दोन पोलीस उपनिरीक्षक, दोन शिपाई आणि एक तक्रारदार असे मिळून ५ जणांचा जागीच मृत्यू झाला. या घटनेने पोलिसांच्या वर्तुळात शोककळा पसरली आहे.

मिळालेल्या माहितीनुसार, जालौन पोलिसांचं पथक अपहरण प्रकरणात नूंहमध्ये पोहोचलं. त्यानंतर परतताना पोलिसांच्या पथकाच्या वाहनाचा अपघात झाला. पथकातील पोलीस उपनिरीक्षक मोहित यादव, पोलीस अधिकारी सत्यभान यांच्यासहित दोन कर्मचाऱ्यांचा मृत्यू झाला. तसेच एका तक्रारदाराचाही मृत्यू झाला. कारवाई केल्यानंतर घरी परतताना अपघात झाल्याची माहिती मिळत आहे.

प्रत्यक्षदर्शीने सांगितलेल्या माहितीनुसार, रस्त्यावर भीषण अपघात झाला. कार भरपूर वेगात होती. त्याचवेळी चालकाने वाहनावरील नियंत्रण गमावलं. त्यानंतर कार अनियंत्रित होऊन अपघात झाला. अपघातात कारच्या पुढील भागाचा चेंदामेंदा झाला. कारमधील सर्वांचा मृत्यू झाला. अपघाताची माहिती मिळताच स्थानिक पोलीस आणि प्रशासकीय अधिकारी घटनास्थळी पोहोचले.

अपघातानंतर बचाव कार्य सुरू करण्यात आले आहेत. परंतु तोर्यंत कारमधील सर्वांचा मृत्यू झाला होता. पोलिसांनी कारमधील मृतदेह ताब्यात घेऊन पोस्टमार्टमसाठी पाठवले. त्यांनी मृतांच्या नातेवाईकांना तातडीने माहिती दिली. ४ ऑन ड्युटी पोलीस कर्मचाऱ्यांचा मृत्यू झाला आहे. या अपघातानंतर पुन्हा एकदा रस्ता सुरक्षेचा प्रश्न ऐरणीवर आला आहे. आरोपींना शोधण्यासाठी पोलिसांच्या दुसऱ्या राज्यात जाऊनही शोध घ्यावा लागतो. य पथकाला रस्ते मार्गाने जाताना अपघाताची भीती असते.

उत्तर प्रदेशातील राष्ट्रीय महामार्गावर भीषण अपघात

उत्तर प्रदेशातील जालौन - झांसी - कानपूर राष्ट्रीय महामार्गावर सोमवारी सकाळी भीषण अपघात झाला. या अपघातात ६ जणांचा मृत्यू झाला. तर ४ जण गंभीर जखमी झाले. कालपी पोलीस ठाण्याच्या हद्दीत जोल्हुपूरजवळ चौरासा गुबंदजवळ ही अपघाताची घटना घडली. भरधाव वेगात असलेली कार पाठीमागून ट्रकच्या खाली घुसली. त्यानंतर कारच्या पुढच्या भागाचा चक्काचूर झाल्याचे दिसून आले.