पगारवाढीवरून तुफान राडा; पोलीस आणि कर्मचाऱ्यांमध्ये धक्काबुक्की, कामगारांकडून पोलीस वाहनांची तोडफोड

वेतनवाढीच्या मागणीसाठी नोएडामध्ये सुरू असलेले कामगारांच्या आंदोलनाने हिंसक वळण घेतले आहे. सोमवारी सकाळी ग्रेटर नोएडाच्या फेज २ मधील होजरी कॉम्प्लेक्स डी ब्लॉकमध्ये कामगार आणि पोलीस यांच्यात धक्काबुक्की झाली. यानंतर कामगारांनी पोलिसांचे वाहनांची तोडफोड करत त्यांना पेटवून दिले. यामुळे संपूर्ण परिसरात तणाव निर्माण झाला आहे.

दरम्यान नियंत्रणाच्या बाहेर गेलेल्या स्थिती नियंत्रणात आणण्यासाठी पोलिसांनी आंदोलकांवर अश्रुधुराच्या नळकांड्यां फोडल्या. घटनास्थळी मोठा पोलीस बंदोबस्त तसेच पीएसी तैनात करण्यात आले आहेत. मिळालेल्या माहितीनुसार, कंपनीचे कर्मचारी पगारवाढीच्या मागणीसाठी गेल्या अनेक दिवसांपासून आंदोलन करत होते. सोमवारी या आंदोलनाला अचानक हिंसक वळण लागले.

आंदोलक आणि पोलीस यांच्यात वाद झाला त्यानंतर धक्काबुक्की झाली. संतप्त कामगारांनी पोलिसांवर दगडफेक केली. घटनास्थळी उभ्या असलेल्या पोलिसांच्या वाहनांची तोडफोड केली, असा पोलीस कर्मचाऱ्यांचा आरोप आहे. इतकेच नव्हे तर, पोलिसांचे एक वाहनाला पलटी केले, काही ठिकाणी जाळपोळ झाली. यामुळे आंदोलनाची स्थिती अजून जास्त बिघडली.

परिस्थिती बिघडत असल्याचे पाहून पोलिसांनी जमावाला नियंत्रणात आणण्यासाठी कठोर उपाययोजना केल्या. आंदोलकांना पांगवण्यासाठी पोलिसांनी अश्रुधुराच्या नळकांड्या फेकल्या. त्यानंतर घटनास्थळी अतिरिक्त पोलीस दल तैनात करण्यात आले. यानंतर परिस्थिती हळूहळू नियंत्रणात आणण्यात आली.

या संपूर्ण घटनेनंतर नोएडा पोलीस आयुक्तांनी हे प्रकरण गंभीरतेने घेतले असून कारवाई सुरू केली आहे. प्राथमिक तपासाच्या आधारे अनेक पोलीस अधिकाऱ्यांना निलंबित करण्यात आले आहे. सध्या परिसरात मोठा पोलीस बंदोबस्त तैनात असून परिस्थितीवर लक्ष ठेवले जात आहे.