Accident : रक्षाबंधनापूर्वीच भावाबहिणीची ताटातूट, बहिणीला शाळेत सोडलं अन्...; कुटुंबाचा मन हेलावणारा आक्रोश

Shocking Accident : आयटीआयचे शिक्षण घेणारा एक तरुण त्याच्या बहिणीला शाळेत सोडायला गेला होता. बहिणीला शाळेत सोडल्यानंतर परतत असताना त्याच्या दुचाकीचा अपघात झाला. दुसऱ्या दुचाकीला तरुणाची दुचाकी धडकली. हा अपघात इतका भीषण होता की, यात तरुणाचा मृत्यू झाला. तरुणाव्यतिरिक्त आणखी तिघेजण या अपघातात गंभीर जखमी झाले. पोलिसांनी घटनास्थळी पोहोचून मृतदेह ताब्यात घेतला आणि जखमींना उपचारासाठी रुग्णालयात पाठवले.

मिळालेल्या माहितीनुसार, अपघातामध्ये मृत्युमुखी पडलेल्या १९ वर्षीय तरुणाचे नाव अभय यादव असे आहे. अभय हा आयटीआयचा विद्यार्थी होता. तो सकाळी सीओडी गेट येथील केंद्रीय विद्यालयामध्ये त्याच्या बहिणीला सोडण्यासाठी गेला होता. तिला शाळेत सोडल्यानंतर तो दुचाकीवरुन घरी परतत होता. त्याचे घर नैनी पोलीस स्टेशन परिसरात आहे.

बहिणीला शाळेत सोडून आल्यानंतर एफसीआय रोडवरील एका खासगी महाविद्यालयासमोर अभयच्या दुचाकीचा अपघात झाला. त्याची दुचाकी समोरुन येणाऱ्या दुचाकीला धडकली. या अपघातात अभय गंभीर जखमी झाला. अपघाताची माहिती मिळताच त्याच्या नातेवाईकांनी अभयला जवळच्या रुग्णालयात दाखल केले. पण उपचार सुरु करण्याआधीच डॉक्टरांनी अभयला मृत घोषित केले. दुसऱ्या दुचाकीवर बसलेले तरुण देखील दुखापतग्रस्त झाले आहेत.

रक्षाबंधनाच्या सणाला अवघे काही दिवस उरले आहेत. हा सण साजरा करण्याआधीच अभयच्या बहिणीने तिच्या भावाला अपघातात गमावले. शाळा संपल्यानंतर ती अभयची वाट पाहत होती. तिला जेव्हा तिच्या भावाच्या, अभयच्या मृत्यूची बातमी मिळाली, तेव्हा ती बेशुद्ध पडली. बहिणीला शाळेत सोडतानाचा अभय यादवचा प्रवास हा त्याच्या आयुष्यातला शेवटचा प्रवास ठरला.