Tamil Nadu New CM: मोठी बातमी! तमिळनाडूमध्ये आकड्यांचे गणित जुळलं, उद्या होणार नव्या मुख्यमंत्र्याचा शपथविधी

Summary:

• थलपती विजय तामिळनाडूचे मुख्यमंत्री होणार

• थलपती विजय उद्या सकाळी ११ वाजता शपथ घेणार

• टीव्हीके पक्षाला बहुमताचा आकडा पार करण्यात यश

तामिळनाडूमध्ये नवीन सरकार स्थापनेबाबतचा तिढा अखेर सुटला. टीव्हीकेचे प्रमुख थलपती विजय यांनी आज तामिळनाडूचे राज्यपाल राजेंद्र आर्लेकर यांची भेट घेऊन सरकार स्थापन करण्याचा दावा केला. थलपती विजय हे तामिळनाडूचे नवे मुख्यमंत्री होणार असल्याचे निश्चित झाले आहे. ते उद्या सकाळी ११ वाजता शपथ घेतील. त्यामुळे तमिळनाडूमध्ये थलपती विजय यांच्या कार्यकर्त्यांमध्ये आनंदाचे वातावरण आहे.

थलपती विजय यांनी सरकार स्थापन करण्याचा दावा करत आज राज्यपालांकडे ११८ आमदारांनी पाठिंबा दिल्याचे पत्रे सादर केली. तामिळनाडू विधानसभा निवडणुकीत टीव्हीकेने १०८ जागा जिंकल्या. त्यापैकी दोन जागा थलपथी विजय यांनी जिंकल्या आहेत. आता विजय यांना एक जागा सोडावी लागेल. अशा परिस्थितीत फक्त १०७ टीव्हीके आमदारांची मते मोजली जाणार आहेत. याशिवाय थलपथी विजय यांना २ आययूएमएल, २ सीपीआय, २ सीपीएम, २ व्हीसीके आणि ५ काँग्रेस आमदारांचा पाठिंबा मिळाला आहे.

२३४ विधानसभेच्या जागा असलेल्या तमिळनाडूमध्ये सरकार स्थापन करण्यासाठी बहुमताचा आकडा ११८ आहे. थलपती विजय यांच्याकडे आमदारांचा आकडा १०७ चा आहे. आता त्यांना आययूएमएल, सीपीआय, सीपीएम, व्हीसीके आणि काँग्रेसच्या आमदारांनी पाठिंबा दिला. थलपती विजय यांना आवश्यक असणाऱ्या बहुमतापेक्षा जास्त म्हणजे १२१ आमदारांचा पाठिंबा मिळाला.

बहुमताच्या आकड्यांचे गणित जुळल्यानंतर थलपती विजय यांचा मुख्यमंत्री होण्याचा मार्ग मोकळा झाला. ते आता उद्या तामिळनाडूच्या मुख्यमंत्रिपदाची शपथ घेतील. चेन्नई येथील जवाहरलाल नेहरू इनडोअर स्टेडियममध्ये थलपती विजय उद्या सकाळी ११ वाजता मुख्यमंत्रिपदाची शपथ घेतील. या स्टेडियमवर शपथविधी सोहळ्याची तयारी सुरू झाली आहे. या सोहळ्याची जबाबदारी ग्रेटर चेन्नई कॉर्पोरेशनने घेतली आहे.