७ कोटींचा व्हिला, ५० तोळं सोनं अन् २५ एकर जमीन; सरकारी इंजिनिअरच्या घरात सापडलं घबाड, ACB ची १० ठिकाणी धाड

तेलंगणातील एका भ्रष्ट सरकारी अधिकाऱ्याच्या बेहिशेबी मालमत्तेची थक्क करणारी बातमी समोर आली. त्या अधिकाऱ्याच्या घरात तब्बल ५० तोळे सोनं अन् रोकड मिळाली. इतकेच नाही तर तब्बल २५ एकर जमीन आणि ७ कोटींचा बंगला त्या अधिकाऱ्याकडे असल्याची धक्कादायक माहिती तपासात समोर आली. एसीबीने सरकारी अधिकाऱ्याच्या मालकीच्या १० ठिकाणी एकाचवेळी छापा मारला. या छापेमारीत हादरवणारी संपत्ती असल्याचे समोर आले आहे. आज तकने याबाबतचे वृत्त दिले आहे.

तेलंगणात पाणीपुरवठा व सिंचन विभागातील उप-कार्यकारी अभियंत्याकडे (Deputy Executive Engineer) बेहिशेब संपत्ती असल्याचे लाचलुचपत प्रतिबंधक विभागाच्या (ACB) तपासात उघड झाले. एसीबीच्या पथकाने आरोपीच्या १० वेगवेगळ्या ठिकाणांवर एकाच वेळी छापे टाकले. या कारवाईत अधिकाऱ्याकडे ७ कोटी रुपयांचा आलिशान बंगला, २५ एकर शेतजमीन, ५० तोळे सोने, तसेच अनेक फ्लॅट्स आढळून आले आहेत. एका सरकारी कर्मचाऱ्याकडे इतकी अफाट संपत्ती कशी जमा झाली, याबाबत आता एसीबीकडून कसून चौकशी सुरू आहे.

लाचखोर उपकार्यकारी अभियंत्याचं नाव राघिरी सत्यनारायण असे आहे. त्याच्या मालकीच्या १० ठिकाणी एकाच वेळी धाड टाकली. यावेळी तपास यंत्रणेला जमीन, व्हिला, फ्लॅट्स, सोने, वाहने आणि इतर गुंतवणुकीसह अनेक मालमत्ता सापडल्या. या यादीत ₹७ कोटी (अंदाजे $१.२ दशलक्ष) किमतीच्या एका व्हिलाचा समावेश आहे. त्याशिवाय २५ एकर शेतजमीन ५० तोळे सोने आणि जमिनीचे अनेक भूखंडही सापडले. एका सरकारी अभियंत्याने आपल्या उत्पन्नाच्या तुलनेत एवढी संपत्ती कशी जमवली, याचा तपास एसीबी आता करत आहे.

एजन्सीच्या पथकांनी सत्यनारायणाशी संबंधित १० ठिकाणांना भेट दिली. त्याचे मूळ गाव शापूर, वनपर्थी, हैदराबाद आणि कुटुंबीय व नातेवाईकांच्या मालकीच्या अनेक ठिकाणांचा समावेश होता. या धाडीत तपास यंत्रणेने जमीन आणि घरांशी संबंधित कागदपत्रे, तसेच इतर मालमत्तांविषयी माहिती गोळा केली. या मालमत्तांचे बाजारमूल्य पूर्वीच्या अंदाजापेक्षा खूप जास्त असू शकते.

७ कोटी रुपये किमतीचा व्हिला, पत्नीच्या नावावर ९ भूखंड

एसीबीच्या तपासात हैदराबादमधील कुकटपल्ली येथे एक व्हिला उघडकीस आला आहे. तो व्हिला कथितरित्या कुटुंबातील सदस्यांच्या मालकीचा असून त्याचे बाजारमूल्य अंदाजे ७ कोटी रुपये आहे. त्याशिवाय वनपर्थी येथे २५ एकर शेतजमीन आणि एक फार्महाऊस देखील सापडले आहे.

सत्यनारायण यांच्या पत्नीच्या नावावर असलेल्या नऊ मोकळ्या भूखंडांचीही माहिती समोर आली आहे. हैदराबादमधील दोन फ्लॅट्सचीही चौकशी सुरू आहे. यामध्ये कर्मणघाट येथील ३-बीएचके फ्लॅट आणि नागोलेच्या रॉकटाऊनमधील २-बीएचके फ्लॅटचा समावेश आहे.