आधी ज्योतिष्याला OSDपद, आता चित्रपट निर्मात्याची थेट कॅबिनेट मंत्रिपदी नियुक्ती; मुख्यमंत्र्यांच्या निर्णयानं खळबळ

तमिळनाडू सरकारच्या एका निर्णयामुळे नवीन राजकीय वाद निर्माण झाला आहे. मुख्यमंत्री सी. जोसेफ विजय यांनी व्यावसायिक आणि चित्रपट निर्माते के. वेंकट नारायणन यांची नवी दिल्ली येथे तमिळनाडूचे 'विशेष प्रतिनिधी' म्हणून नियुक्ती केली आहे. या पदाचा दर्जा कॅबिनेट मंत्र्यासारखा असतो. या नियुक्तीवरून विरोधी पक्षांनी सरकारवर टीकेची झोड उठवली आहे.

चित्रपट निर्मात्यासाठी नवीन पदाचं निर्माण केलं

राज्य सरकारने जारी केलेल्या आदेशानुसार एका वर्षाच्या कालावधीसाठी हे पद निर्माण करण्यात आले आहे. मुख्य सचिव एम. साई कुमार यांनी यासंदर्भातील आदेश जारी केला आहे. या नियुक्तीच्या उर्वरित अटी व शर्तींची घोषणा नंतर केली जाणार आहे.

नवी दिल्लीतील तामिळनाडूच्या विशेष प्रतिनिधीची जबाबदारी केंद्र आणि राज्य सरकारमधील समन्वयाला चालना देणे आहे. या पदावरील व्यक्ती मुख्यमंत्री आणि केंद्रीय मंत्र्यांच्या बैठकांच समन्वय करत असतो. त्या आयोजित करणं, केंद्र योजना आणि निधीवर नजर ठेवण्याची जबाबदारी यांच्यावर असते.

के. वेंकट नारायण कोण आहेत?

के. वेंकट नारायण हे बेंगळुरूस्थित 'केव्हीएन ग्रुप'चे (KVN Group) अध्यक्ष आहेत. त्यांची कंपनी रिअल इस्टेट आणि मनोरंजन क्षेत्रात कार्यरत आहे. त्यांनी याआधी 'प्रेस्टिज ग्रुप'चे मुख्य कार्यकारी अधिकारी (CEO) म्हणून काम केले आहे. त्यांनी २०२० मध्ये 'केव्हीएन प्रॉडक्शन्स'ची (KVN Productions) स्थापना केली.

ही कंपनी सध्या 'जन नायकन' (Jana Nayakan) या चित्रपटाची निर्मिती करत आहे. हा मुख्यमंत्री विजय यांचा अखेरचा चित्रपट आहे. राजकारणात पूर्णपणे सक्रिय होण्यापूर्वीचा विजय यांचा हा शेवटचा चित्रपट असेल, असे मानले जात आहे.

विरोधकांची मुख्यमंत्र्यावर टीका

या नियुक्तीवरून विरोधी पक्षाने मुख्यमंत्र्यावर हल्लाबोल केला आहे. तामिळनाडूच्या हिताचे रक्षण करण्याची जबाबदारी असलेल्या अशा महत्त्वपूर्ण पदावर एखाद्या चित्रपट निर्मात्याची नियुक्ती करणे ही त्या पदाच्या प्रतिष्ठेला कमी करणारी बाब आहे, अशी टीका द्रमुकचे (DMK) राज्यसभा खासदार पी. विल्सन यांनी केली आहे.