दिवस उजाडताच विमानाचा भीषण अपघात; क्षणात उडाला आगीचा भडका, पायलटसह सर्व प्रवाशांचा जागीच मृत्यू

Plane Crash in South Sudan : जगात आणखी एक विमान अपघाताची घटना घडली आहे. दक्षिण सुदानची राजधानी जुबाजवळ विमानाचा अपघात झाला. या दुर्घटनेत १४ जणांचा जागीच मृत्यू झालाय. विमान छोटे असल्याने त्यात पायलटसह १४ जण प्रवास करत होते. विमान जमिनीवर कोसळल्यानंतर क्षणात आगीचा भडका होऊन सर्व जण होरपळले. या आगीत होरपळल्यामुळे प्रवाशांच्या मृतदेहाची ओळख पटवणे देखील अवघड झालं आहे.

रिपोर्टनुसार, दक्षिण सुदानच्या नागरी विमान वाहतूक प्राधिकरणाने सांगितलं की, 'तेथील स्थानिक वेळेनुसार सकाळी ७.१५ वाजता दुर्घटना घडली. विमानाने जुबा आंतरराष्ट्रीय विमानतळावर उड्डाण घेतलं. त्यानंतर २० किलोमीटरवर जाऊन प्रवाशांनी भरलेलं विमान कोसळलं. सैसना असे विमानाचे नाव आहे. विमानात पायलट आणि प्रवासी असे एकूण १४ जण होते.

अधिकाऱ्यांनी दिलेल्या माहितीनुसार, खराब वातावरण आणि दृश्यमानता कमी असल्याने विमान अपघात झाल्याचा प्राथमिक अंदाज वर्तवण्यात येत आहे. अपघाताची माहिती मिळताच संयुक्त राष्ट्राची बचाव पथक घटनास्थळी पोहोचले. या पथकाकील एका सदस्याने सांगितले की, मृतदेहाचा जळून कोळसा झाला होता. त्यामुळे मृतदेहाची ओळख पटवणे देखील अवघड झालं आहे'.

मृतांमध्ये दक्षिण सुदान आणि केनियाच्या नागरिकांचा समावेश आहे. दक्षिण सुदानचे १२ नागरिक आणि केनियाच्या २ नागरिकांचा समावेश आहे. दक्षिण सुदानमध्ये विमान अपघाताच्या घटनेत वाढ होताना दिसत आहे. खराब हवामान, जास्त भार, पायाभूत सुविधांच्या अभावामुळे विमान अपघात वाढत असल्याचे सांगण्यात येत आहे. मागील काही वर्षात झालेल्या विमान अपघातात झझनभर लोकांचा बळी गेला आहे.

अपघातानंतर तपास सुरू करण्यात आला आहे. या अपघाताचा अधिकृत तपास अहवाल प्रसिद्ध करण्यात आलेला नाही. तपास यंत्रणा घटनास्थळी दाखल झाले आहेत. या संपूर्ण तपासानंतरच अपघाताचे कारण कळेल. वाढत्या विमान अपघातामुळे हवाई प्रवासाच्या सुरक्षेचा प्रश्न ऐरणीवर आला आहे.