Raja Raghuvanshi: राजा रघुवंशीला क्रूरपणे मारत होते; सोनम निर्दयीपणे बघत होती, भयानक हत्याकांडाला धक्कादायक वळण

इंदूरमधील राजा रघुवंशीच्या हत्या प्रकरणाने संपूर्ण देश हादरला. राजाची हत्या त्याची बायको सोनमनेच केली हे जेव्हा समोर आलं तेव्हा सर्वांना हादरला बसला. सोनमनेच आपल्या बॉयफ्रेंडच्या मदतीने या हत्येचा कट रचला होता. यासाठी तिने ३ शूटर्सला सुपारी दिली होती. महत्वाचे म्हणजे सोनमने राजाला न सांगता हनिमूनसाठी शिलाँगचे तिकीट बुक केले होते. त्याठिकाणी नेऊन राजाची हत्या करण्यात आली. राजाची हत्या होत असताना सोनम तिथेच होती. आरोपी कुऱ्हाडीने राजावर वार करत राहिले आणि सोनम ते पाहत राहिली.

राजा रघुवंशी हत्याकांड प्रकरणातील सर्व आरोपींनी गुन्ह्याची कबुली दिली आहे. या प्रकरणात सोनमसह ५ आरोपींना पोलिसांनी अटक केली आहे. आरोपीने फक्त राजाची हत्या केल्याची कबुली दिली नाही. तर राजाची पत्नी सोनम रघुवंशी घटनास्थळी उपस्थित होती आणि तिच्या नवऱ्याचा मृत्यू होताना ती पाहत होती.

राजा रघुवंशीवर पहिला हल्ला विशाल उर्फ ​​विकी ठाकूरने केला. चौकशीदरम्यान आरोपीने सांगितले की, राजा रघुवंशीवर कुऱ्हाडीने हल्ला केला आणि नंतर त्याचा मृतदेह खोल दरीत फेकून दिला. हत्याचे संपूर्ण थरार आरोपींनी पोलिसांना सांगितला. गुन्हे शाखेच्या तपासानुसार, विशाल, आकाश आणि आनंद हे तिघे आरोपी इंदूरहून ट्रेनने गेले. त्यांनी मेघालयला पोहोचण्यासाठी अनेक गाड्या बदलल्या. सर्वात आधी ते गुवाहाटी आणि नंतर शिलाँगला गेले.

सोनमचा बॉयफ्रेंड राज कुशवाहा इंदूरमध्येच राहिला. परंतु त्याने तिन्ही शूटर्सला त्यांच्या प्रवासाच्या खर्चासाठी प्रत्येकी ४०,००० ते ५०,००० रुपये देऊन आर्थिक मदत केल्याचा आरोप आहे. आरोपीने पोलिसांना सांगितले की, राजा मारला गेला तेव्हा सोनम घटनास्थळी उपस्थित होती आणि ती सर्वकाही पाहत होती. दरम्यान, नवऱ्याच्या हत्येनंतर सोनमने ड्रग्ज घेतलं आणि अपहरणाचा कांगावा केला. ती त्याठिकाणावरून फरार झाली. या हत्याकांडातील सर्व आरोपींना अटक झाल्याचे कळाल्यानंतर सोनमने आत्मसमर्पण केले.