India Aghadi: इंडिया आघाडीत नेतृत्वावरून फूट? राहुल गांधींच्या नेतृत्वाला ममतादीदींचं आव्हान

स्नेहिल झणके, साम टीव्ही

देशातील विरोधी पक्षांची इंडिया आघाडी फूटीच्या उंबरठ्यावर आहे. राहुल गांधींच्या नेतृत्त्वावर थेट ममता बॅनर्जींनी सवाल उपस्थित केल्यानंतर इंडिया आघाडीचं पुढे काय होणार असा प्रश्न उपस्थित झालाय. विशेष म्हणजे यात ठाकरे गटानंही उडी घेत ममता बॅनर्जींना पाठिंबा दर्शवलाय. नेमकं असं काय घडलं इंडिया आघाडीत हे आपण जाणून घेणार आहोत....

देशातील मोदींची सत्ता उलथवून लावण्यासाठी एकत्र आलेल्या इंडिया आघाडीत दीड वर्षांतच फूट पडणार असल्याची शक्यता दिसत आहे. इंडिया आघाडीतील प्रमुख पक्ष असलेल्या तृणमूल काँग्रेसनं इंडिया आघाडीच्या नेतृत्त्वावर सवाल उपस्थित करत थेट इंडिया आघाडीचं नेतृत्त्व करण्यास ममता बॅनर्जी उत्सुक असल्याचं म्हटलं आहे.

'मी इंडिया आघाडीची स्थापना केली होती. आता आघाडीचं नेतृत्त्व करण्याऱ्यांवर ती नीट चालवण्याची जबाबदारी आहे. ते चालवत नसतील, तर मी काय करु शकते? जर मला संधी दिली तर मी इंडिया आघाडी व्यवस्थित काम कशी करेल याकडे लक्ष देईन. बंगालबाहेर जाण्याची माझी इच्छा नाही, पण मी इथून नेतृत्त्व करु शकते.', असं ममता बॅनर्जी यांनी सांगितले.

ममता बॅनर्जींनी थेट इंडिया आघाडीच्या नेतृत्त्वावरुन राहुल गांधींवर निशाणा साधला. यात आता ठाकरे गटानं देखील उडी घेतली आहे. ममता बॅनर्जींनी इंडिया आघाडीचं नेतृत्व करावं अशी भूमिका ठाकरे गटाने घेतली आहे. त्यामुळे काँग्रेसची चांगलीच अडचण झाली आहे. आता काँग्रेस नेमकी काय भूमिका घेतेय याकडे सर्वांचे लक्ष लागले आहे.

हरियाणा आणि महाराष्ट्राच्या विधानसभा निकालानंतर इंडिया आघाडीतील मतभेद प्रकर्षानं समोर आलेत आणि म्हणूनच सोमवारी झालेल्या संसदेबाहेरील अदानींविरोधातील इंडिया आघाडीच्या आंदोलनात देखिल तृणमूल, सपा आणि आम आदमी पार्टी दूर राहिल्याचं दिसलं. निवडणूकीच्या आधी इंडिया आघाडीतून नितीशकुमार बाहेर पडले. तर लोकसभा निवडणुकीत इंडिया आघाडीत असून देखील आप आणि तृणमूलनं पंजाब आणि पश्चिम बंगालमध्ये स्वतंत्र निवडणुका लढवत स्वत:ची ताकद दाखवली. त्यामुळे इंडिया आघाडीतील घटक पक्षांचा राहुल गांधींच्या नेतृत्त्वावर विश्वास उरला नाही का? असा प्रश्न उपस्थित झाला आहे.