भारताच्या राजधानीत पाकिस्तानी दहशतवाद्यांच्या नेटवर्कचा पर्दाफाश; 7 जणांच्या मुसक्या आवळल्या

दिल्ली पोलिसांच्या विशेष पथकाने पाकिस्तानप्रणित दहशतवाद्यांच्या नेटवर्कचा पर्दाफाश केला आहे. पोलिसांनी दहशतवादी नेटवर्कचा भंडाफोड करत सात जणांना ताब्यात घेतलं आहे. पाकिस्तानी शहाजाद भट्टी आणि त्याचा सहकारी अजमल गुज्जर हे दोघे भारतात नेटवर्क चालवत होते. पंजाबमार्गे पाकिस्तानहून बेकायदेशीर शस्त्रे , जिवंत काडतुसे, अंमलीपदार्थ हे दिल्लीत पुरवली जात होती.

पोलिसांनी कारवाईदरम्यान आरोपींकडून पाच पिस्तुल, ४१ जिवंत काडतुसे, सात मोबाईल, कार जप्त करण्यात आली आहे. विशेष पथकाच्या माहितीनुसार, पाकिस्तानी दहशतवाद्यांच्या नेटवर्कच्या माध्यमातून भारतीय तरुणांना जाळ्यात अडकवत होते. भरपूर पैसे कमावण्याचं आमिष देऊन नेटवर्कचा भाग बनवत होते. त्यानंतर भारतीय तरुणांचा शस्त्रे आणि अंमलीपदार्थ पुरवण्याच्या कामात वापर केला जायचा.

खरंतर पोलिसांना आरोपींच्या नेटवर्कची माहिती मे २०२६ रोजी मिळाली. पोलिसांना शाहजाद भट्टी आणि अजमल गुज्जर दिल्ली-एनसीआरमध्ये दहशतवाती कारवाया करण्यासाठी कट रचत असल्याची माहिती मिळाली. त्यानंतर पोलिसांनी सुरू केलेल्या तपासादरम्यान मोहित उर्फ योगी याला अटक केली. त्याच्याजवळ बेकायदेशीर शस्त्रे आढळले. तसेच त्याच्याजवळ पाकिस्तानी हँडलरचे मोबाइल नंबर देखील आढळले. त्यानंतर इतर आरोपी देखील जाळ्यात अडकले.

पोलिसांनी आरोपींची कसून चौकशी केली. त्यावेळी त्यांनी दिल्ली, गाझियाबाद आणि आसपासच्या अनेक ठिकाणांची रेकी केल्याची माहिती दिली. आरोपी फोटो आणि व्हिडिओ हे पाकिस्तानमध्ये दहशतवाद्यांना पाठवत होते. पोलिसांनी दिलेल्या माहितीनुसार, आरोपी ड्रोनच्या माध्यमातून पाकिस्तानहून पाठवलेली शस्त्रे, अमलीपदार्थ पंजाबहून दिल्ली-एनसीआरमध्ये आणायचे काम करत होती.

पोलिसांच्या माहितीनुसार, नेटवर्कशी संबंधित आरोपींच्या विरोधात आधीच हत्या, हत्येचा प्रयत्न आणि दरोडा, एनडीपीएस कायद्यांतर्गत गुन्हे दाखल आहेत. दिल्ली पोलीस या नेटवर्कशी संबंधित फरार आरोपींचा शोध घेत आहे.