Nepal Protest: नेपाळमध्ये भारतीय भाविकांच्या बसवर आंदोलकांचा हल्ला; अनेकजण जखमी

नेपाळमधील आंदोलकांनी भारतीय भाविकांच्या बसवर दगडफेक केली. काठमांडूमधील पशुपतिनाथ धामचे दर्शन करून पतरणाऱ्या भाविकांच्या बसवर आंदोलकांनी दगडफेक केली. या हल्ल्यात अनेक भाविक जखमी झालेत. ही घटना ९ सप्टेंबर रोजी घडली होती. या हल्ल्याप्रकरणी बस चालकाने माहिती दिलीय. बस चालकाने असा दावा केला की आंदोलनकर्त्यांनी त्यांच्या बसला घेरले आणि दगडफेक केली.

बसच्या खिडक्या फोडल्या आणि अनेक प्रवासी जखमी झालेत. नेपाळमध्ये झेन जी लोकांचे आंदोलन चालू आहे, त्यांनी तेथील सत्ता उलथवून लावलीय. बस चालक रामू निषाद यांनी सोनौली येथे माध्यमांना सांगितले की, ते पशुपतिनाथ मंदिराचे दर्शन घेऊन परतत होते, त्यावेळी जमावाने त्यांच्या बसला घेरले. 'आंदोलकांनी कोणत्याही कारणाशिवाय बसवर हल्ला केला. बसमध्ये महिला आणि वृद्ध भाविक होते, परंतु आंदोलकांनी कोणाची पर्वा न करता त्यांनी बसवर हल्ला चढवला.

या दगडफेकीत अनेक भाविक जखमी झालेत. स्थानिक अधिकाऱ्यांनी जखमी प्रवाशांना ताबडतोब काठमांडू येथील रुग्णालयात दाखल केले. यानंतर भारतीय दूतावासाने नेपाळ सरकारकडे मदत मागितली. दोन्ही देशांमधील समन्वयातून उर्वरित प्रवाशांना विशेष विमानाने भारतात परत आणण्याची व्यवस्था करण्यात आली.

नेपाळमध्ये तेथील सरकारविरोधात झेन-जी लोकांचे आंदोलन चालू आहे. या आंदोलनात कमी वयोगटातील लोक सहभागी आहेत. दरम्यान शांततेत चालणाऱ्या आंदोलनाने अचानक हिंसक वळण घेतले. त्यात आतापर्यंत ३४ जणांचा बळी गेलाय. देशातील संसद भंग करण्यात यावी, तेथील संविधान देखील बदलण्यात यावे, अशी आंदोलकांची मागणी आहे.