अनैतिक संबंधांचा भयानक शेवट! विवाहित प्रेयसीनं प्रियकराला हॉटेलमध्ये नेलं, डोकं ठेचून हत्या केली, मृतदेहाजवळ बसून रडली

उत्तर प्रदेशातील आग्रा जिल्ह्यातील इटौरा भागात शुक्रवारी एक धक्कादायक घटना उघडकीस आली. इटौरा चौकातील एका हॉटेलमध्ये एका महिलेने तिच्या प्रियकराची अत्यंत निर्घृणपणे हत्या केली. दुपारी 12च्या सुमारास ही घडली असून या घटनेने परिसरात मोठी खळबळ उडाली आहे.

मिळालेल्या माहितीनुसार, फतेहपुर सीकरी येथील रहिवासी असलेला तरुण एका विवाहित महिलेसोबत इटौरा चौकातील हॉटेलमध्ये आला होता. दोघांनी हॉटेलच्या तिसऱ्या मजल्यावरील एक खोली भाड्याने घेतली. काही वेळानंतर दोघांमध्ये कोणत्यातरी कारणावरून वाद झाला. या वादाचे रूपांतर हाणामारीत झाले. रागाच्या भरात महिलेने तरुणावर जड वस्तूने हल्ला केला. तरुण जागीच खाली कोसळला आणि बेशुद्ध पडला. त्यानंतर महिलेने त्याचे डोके ठेचले आणि धारदार शस्त्राने गळा चिरून त्याला जागीच संपवले.

हत्येनंतर मृतदेहाजवळच बसून राहिली महिला

हत्येच्या घटनेनंतर महिला स्वतःच मोठ्याने ओरडून हत्येची कबुली देऊ लागली. तिचा आवाज ऐकून हॉटेल कर्मचारी खोलीकडे धावले. तिथे रक्ताच्या थारोळ्यात तरुणाचा मृतदेह पडलेला होता आणि महिला तिथेच बाजूला बसून होती. हॉटेल चालकाने तातडीने पोलिसांना या घटनेची माहिती दिली.

घटनेची माहिती मिळताच पोलिसांनी घटनास्थळी धाव घेत महिलेला ताब्यात घेतले. प्राथमिक तपासात असे समोर आले आहे की, ती महिला विवाहित असून तिला एक मूल देखील आहे. पोलिसांनी तरुणाचा मृतदेह ताब्यात घेऊन पोस्टमार्टमसाठी पाठवला आहे. या घटनेचा अधिक तपास सुरू असून परिसरात खळबळ माजली आहे.