Mamata Banerjee News : ममता बॅनर्जींच्या हेलिकॉप्टरचे इमर्जन्सी लँडिंग, नेमकं काय घडलं?

Mamata Banerjee helicopter emergency landing : पश्चिम बंगालच्या मुख्यमंत्री ममता बॅनर्जी यांना घेऊन जाणाऱ्या हेलिकॉप्टरचे इमर्जन्सी लँडिंग करण्यात आले. ममता बॅनर्जी जलपाईगुडी येथील क्रिन्टीमधील सभेनंतर हेलिकॉप्टरने बागडोगरा येथे जात होत्या. पण मुसळधार पावसामुळे दृश्यमानता कमी झाली. त्यानंतर हेलिकॉप्टर उत्तर बंगालच्या सालुगडा येथील लष्कराच्या हवाईतळावर उतरवण्यात आले.

ममता बॅनर्जी (Mamata Benerjee) या सुरक्षित आहेत, अशी माहिती तृणमूल काँग्रेस नेते राजीव बॅनर्जी यांनी दिली. मिळालेल्या माहितीनुसार, मुख्यमंत्री ममता बॅनर्जी आता रस्ते मार्गे कोलकाता येथे येणार आहेत.

भाजपवर टीकास्त्र

तत्पूर्वी, ममता बॅनर्जी यांनी मंगळवारी जलपाईगुडी येथे स्थानिक स्वराज्य संस्थांच्या निवडणुकीच्या प्रचारसभेला संबोधित केले. यावेळी त्यांनी भाजपवर जोरदार हल्लाबोल केला. भाजपला पराभवाची जाणीव झाली आहे. त्यामुळेच त्यांचे नेते विविध समाज आणि संघटनांपर्यंत पोहोचण्याचाही प्रयत्न करत नाहीत, असे त्या म्हणाल्या.

पंतप्रधान मोदींवरही साधला होता निशाणा

ममता बॅनर्जी यांनी सोमवारी अमेरिका दौऱ्यावरून पंतप्रधान नरेंद्र मोदींवर निशाणा साधला होता. मोदी अमेरिकेला जाऊन पैसे वाया घालवत आहेत. कधी रशियाला, तर कधी अन्य देशात...इथे आपल्या लोकांना पैसे मिळत नाहीत, अशी टीका ममतांनी केली होती.