माजी मुख्यमंत्री ममता बॅनर्जी यांच्या अडचणीत वाढ; केंद्रीय गृहमंत्र्यांवरील टीका भोवली, पोलिसांत FIR दाखल

पश्चिम बंगालच्या माजी मुख्यमंत्री, टीएमसी प्रमुख ममता बॅनर्जी यांच्या अडचणीत वाढ होताना दिसत आहे. कोलकातामध्ये एका आंदोलनादरम्यान बांगलादेशातील हाय-प्रोफाइल हत्याकांडात केंद्रीय गृह मंत्रालय आणि केंद्रीय गृहमंत्री अमित शहा यांच्यावर गंभीर आरोप केल्याने पोलिसांत FIR नोंदवण्यात आला आहे. सिलीगुडीच्या सायबर क्राइम पोलीस स्टेशनमध्ये एका वकिलांनी हा एफआयआर नोंदवला आहे.

काय आहे संपूर्ण प्रकरण?

कोलकाताच्या धर्मतालामध्ये २ जून २०२६ रोजी टीएमसीने एक आंदोलन केलं. या आंदोलनादरम्यान केलेल्या भाषणात ममता बॅनर्जी यांनी धक्कादायक दावा केला. बांगलादेशात झालेल्या एका हत्याकांडातील आरोपींची नावे माहीत आहेत. मी त्याबाबत कोणताही खुलासा करणार नाही. त्यामुळे बांगलादेशाच्या राजकारणात उलथापालथ होईल. त्यांनी अप्रत्यक्षरित्या बांगलादेशचा विद्यार्थी नेता शरीफ उस्मान बिन हादी याच्या हत्येविषयी भाष्य केलं.

तक्रारीत दिलेल्या माहितीनुसार, ममता बॅनर्जी यांनी आंदोलनादरम्यान म्हटलं की, 'एसटीएफने बांगलादेशातून एका आरोपीला अटक केली. यावरून बांगलादेशात मोठ्या प्रमाणात आंदोलन झालं. मी दुसऱ्या देशाविषयी बोलत नाही. माझा मुद्दा असा आहे की, काही लोक मेघालयच्या रस्तेमार्गे पश्चिम बंगालमध्ये आले. मी इतक्या दिवस काही म्हटलं नाही. परंतु आज कौर्याने सीमा गाठली आहे. त्यामुळे मी बोलत आहे. माझ्याकडे खूप काही माहिती आहे'.

ममता बॅनर्जी यांच्या दाव्यानंतर सिलीगुडीचे वकील रिंकी चॅटर्जी सिंह यांनी सिलीगुडी सायबर क्राइम पोलीस स्टेशनमध्ये तक्रार नोंदवली आहे. वकिलांचं म्हणणं आहे की, ममता बॅनर्जी यांनी भाष्य करताना केंद्रीय गृह मंत्रालयावर आरोप केला. वकिलांचा आरोप आहे की, सार्वजनिक मंचावरून संवेदनशील माहिती सांगितल्यास देशाची सुरक्षा धोक्यात येऊ शकते'. याच वकिलांनी मागील आठवड्यात देखील सायबर क्राइम पोलीस स्टेशनमध्ये एफआयआर नोंदवला होता.