Kolkata Law College: हॉकी स्टिकनं मारलं, अब्रूचे लचके तोडले, व्हिडिओ काढला; 'त्या' रात्री नेमकं काय घडलं? पीडितेनं सगळंच सांगितलं

कोलकाता येथील एका नामांकित लॉ कॉलेजच्या कॅम्पसमध्ये २४ वर्षीय विद्यार्थिनीवर तिघा नराधमांनी सामूहिक बलात्कार केला. या घटनेनंतर परिसरात संतापाची लाट उसळली. पीडितेने पोलिसांना आपबिती सांगत घटनाक्रम सांगितला. लग्नाला नकार दिल्यामुळे आरोपींनी तिच्यासोबत जबरदस्ती केली. तसेच व्हिडिओही शूट केला. क्रूरतेची परिसिमा गाठल्यानंतर आरोपींनी पीडितेला हॉकी स्टिकनेही मारहाण केली. तसेच मुख्य आरोपीने जीवे मारण्याची धमकी दिल्याचे पीडितेनं सांगितलं.

पोलिसांनी दिलेल्या माहितीनुसार, मनोजित मिश्रा या घटनेचा मुख्य आरोपी आहे. तो टीएमसीपी युनिटचा सदस्य आहे. त्याने आधी तरूणीवर बलात्कार केला. नंतर हॉकी स्टिकने बेदम मारहाण केली आणि व्हिडिओही शूट केला. 'पोलिसांना सांगितलं तर, ठार मारेन' अशी जीवे मारण्याची धमकी दिली असल्याचं पीडितेनं सांगितलं. या घटनेनंतर पोलिसांनी तपास करीत आरोपींचे मोबाईल जप्त केले. तसेच फॉरेन्सिक विश्लेषणासाठी पाठवले आहेत.

या घटनेची माहिती पोलिसांना मिळताच त्यांनी तातडीने मुख्य तीन आरोपींना बेड्या ठोकल्या आहेत. मनोजित मिश्रा, झैब अहमद आणि प्रमित मुखर्जी अशी तिन्ही आरोपींची नावे आहेत. मनोजित मिश्रा या घटनेचा मुख्य आरोपी आहे. पोलिसांनी तिन्ही आरोपींना बेड्या ठोकून न्यायलयात हजर केलं. न्यायालयाने आरोपींना चार दिवसांची पोलीस कोठडी सुनावली आहे.

या प्रकरणानंतर पीडितेनं पोलीस ठाण्यात फिर्याद दिली. तसेच पीडितेची वैद्यकीय तपासणी करण्यात आली. पोलिसांना माहिती देताना पीडिता म्हणाली, 'त्याने माझ्याशी लैंगित संबंध ठेवण्याच्या उद्देशाने जबरदस्ती करण्याचा प्रयत्न केला. मी नकार दिला. त्याला मागे ढकललं. मी रडले, मला जाऊ देण्यास सांगितलं. पण मला डांबून ठेवलं. त्यांना माझा एक बॉयफ्रेंड आहे आणि माझं त्याच्यावर प्रेम आहे, असंही सांगितलं. पण नराधमांनी काहीही ऐकलं नाही'. असं पीडितेनं सांगितलं.