लग्नात डान्स सुरू असताना छत कोसळलं; वर बसल्या होत्या ३० महिला, काळजाचा ठोका चुकवणारा VIDEO

Chamba Marriage Accident Viral Video : लग्नाचा माहोल. सगळी एकत्र जमलेली. नाच-गाणं सुरू होतं. महिला, लहान मुलांसह अबालवृद्ध सगळेच हे आनंदाचे क्षण डोळ्यांत साठवून ठेवत होते. नाच-गाणं बघण्यात गुंग असतानाच अचानक घराचं छत कोसळलं आणि आनंदाचे क्षण दुःखात बुडाले. या छतावर ३० महिला बसल्या होत्या. त्या सर्व जणी ढिगाऱ्याखाली दबल्या. डोंगराच्या कुशीत वसलेल्या गावात किंकाळ्या ऐकू येऊ लागल्या. या दुर्घटनेचा व्हिडिओ सोशल मीडियावर व्हायरल होत आहे.

हिमाचल प्रदेशातील चंबा जिल्ह्यातील चुराह विभागातील जुंगरा पंचायतीच्या शहवा गावात ही दुर्घटना घडली. लग्नसोहळ्यात नाचगाणं सुरू असतानाच घराचं छत कोसळलं. या छतावर जवळपास ३० महिला बसल्या होत्या. छत कोसळल्यानंतर त्याच्या ढिगाऱ्याखाली या सर्वजणी दबल्या. जवळपास २९ महिला या दुर्घटनेत जखमी झाल्या आहेत.

या दुर्घटनेनंतर लग्नसोहळ्यात गोंधळ उडाला. आनंदावर विरजण पडलं. सगळेच दुःखात बुडाले. स्थानिकांनी तात्काळ मदत आणि बचावकार्य सुरू केलं. त्यानंतर स्थानिक प्रशासनातील अधिकारी-कर्मचारीही घटनास्थळी पोहोचले. जखमी महिलांना तात्काळ सरकारी रुग्णालयात नेण्यात आलं. दुर्घटनाग्रस्त घर मातीपासून तयार केलं होतं. लग्नसोहळ्यातील नाचगाणं बघण्यासाठी या घराच्या छतावर मोठी गर्दी जमली होती. क्षमतेपेक्षा अधिक लोक बसल्यानं भार वाढला आणि छत कोसळलं, असं स्थानिकांनी सांगितलं.

गंभीर जखमी महिलांना चंबा रुग्णालयात पाठवलं

या दुर्घटनेत २९ महिला जखमी झाल्या आहेत. त्यांना तीसाच्या सरकारी रुग्णालयात दाखल करण्यात आलं होतं. त्या सर्वांवर तज्ज्ञ डॉक्टरांच्या देखरेखीखाली उपचार सुरू आहेत. तर त्यातील तीन महिला गंभीर जखमी झाल्या होत्या. त्यांना चंबाच्या मेडिकल कॉलेज आणि रुग्णालयात पुढील उपचारासाठी नेण्यात आलं आहे.