७ मजली इमारतीला भीषण आग, १५ महिलांसह २० जणांचा होरपळून मृत्यू; जकार्तामधील हृदयद्रावक घटना

Indonesia Fire Update : इंडोनेशियाची राजधानी जकार्तामध्ये एका सात मजली टॉवरला भीषण आग लागली. या आगीत होरपळून २० हून अधिक नागरिकांचा मृत्यू झाला आहे. पोलिसांनी याबाबत माहिती दिली. आगीच्या ज्वाळांनी सात मजली इमारतीला सर्व बाजूंनी वेढले. धुराचे लोट सगळीकडे पसरले होते.

सेंट्रल जकार्ताचे पोलीस प्रमुख सुसात्यो पुरनोमो कोंड्रो यांनी या आगीच्या घटनेबाबत सविस्तर माहिती दिली. आतापर्यंत इमारतीतून २० मृतदेह बाहेर काढले आहेत. त्यात ५ पुरुष आणि १५ महिलांचा समावेश आहे. मृत महिलांमध्ये एक गरोदर होती. अधिकाऱ्यांच्या माहितीनुसार, आगीच्या भक्ष्यस्थानी पडलेल्या या इमारतीत टेरा ड्रोन इंडोनेशियाचे कार्यालय आहे. जे उत्खननापासून कृषी क्षेत्रांतील कंपन्यांसाठी ड्रोन सेवा पुरवते. सध्या या आगीवर पूर्णपणे नियंत्रण मिळवले आहे. अद्याप या इमारतीत अडकलेल्या नागरिकांना बाहेर काढण्याचे प्रयत्न सुरू आहेत.

पहिल्या मजल्यावर लागली होती आग

या इमारतीच्या पहिल्या मजल्यावर आग लागली होती. काही वेळात आगीनं रौद्ररूप धारण केलं. ती आग वरच्या मजल्यापर्यंत पसरली. आग लागली त्यावेळी या कंपनीतील काही कर्मचारी जेवण करत होते. तर काही लोक बाहेर गेले होते. आगीचे कारण अद्याप समजू शकलेले नाही. कोम्पास टीव्हीने दाखवलेल्या फुटेजमध्ये अग्निशमन दलाच्या कर्मचाऱ्यांकडून बचावकार्य सुरू असल्याचे दिसते. अनेक नागरिकांना इमारतीबाहेर काढल्याचे दिसून येते. काही जण पोर्टेबल शिड्यांचा वापर करून वरच्या मजल्यांवर अडकलेल्या नागरिकांना सुरक्षितपणे खाली उतरवत असताना या व्हिडिओमध्ये दिसून आले.

हाँगकाँगमध्येही लागली होती भीषण आग

इंडोनेशियामधील आगीच्या घटनेआधी हाँगकाँगमध्येही मागील महिन्यात भीषण आग लागली होती. ताई पो जिल्ह्यात ही घटना घडली होती. त्यात जवळपास १६० नागरिकांचा होरपळून मृत्यू झाला होता. याच वर्षी ऑगस्टमध्ये इंडोनेशियात संतप्त जमावानं संसद भवन पेटवून दिले होते.