Bus Accident News : प्रवाशांनी भरलेल्या बसचा भीषण अपघात, ७ जणांचा जागीच मृत्यू; ११ प्रवासी गंभीर जखमी

Himachal Pradesh Chamba Bus Accident Update News हिमाचल प्रदेशातील चंबा जिल्ह्यात शनिवारी सकाळी भीषण बस अपघात झाला. चुराह विधानसभा मतदारसंघातील तीसा पोलीस ठाण्याच्या हद्दीत बैरागढजवळील चालूंज मोड येथे खासगी बसचा अपघात झाला. या दुर्घटनेत सात जणांचा मृत्यू झाला असून ११ प्रवासी जखमी झाले आहेत. जखमींपैकी सहा जणांना पुढील उपचारांसाठी चंबा येथील पंडित जवाहरलाल नेहरू शासकीय वैद्यकीय महाविद्यालय व रुग्णालयात हलवण्यात आले आहे.

मिळालेल्या माहितीनुसार, हा अपघात शनिवारी सकाळी सुमारे ७.१५ वाजता झाला. ही बस बैरागढहून चंबाच्या दिशेने जात होती. या दरम्यान चालूंज मोडजवळ चालकाचे बसवरील नियंत्रण सुटल्याने बस रस्त्यावरून पलटी होऊन दुसऱ्या रस्त्यावर जाऊन आदळल्याची प्राथमिक माहिती आहे. मात्र, अपघाताचे नेमके कारण अद्याप स्पष्ट झालेले नाही.

घटनेची माहिती मिळताच पोलीस आणि प्रशासनाच्या पथकांनी तातडीने घटनास्थळी धाव घेतली. बचावकार्य सुरू करून जखमींना जवळच्या रुग्णालयात दाखल करण्यात आले. चंबाचे पोलीस अधीक्षक विजय सकलानी यांनी अपघाताची माहिती मिळताच पोलीस पथक घटनास्थळी पाठवण्यात आल्याचे सांगितले.

बचावकार्यात एनडीआरएफ, पोलीस, होमगार्ड, अग्निशमन दल आणि महसूल विभागाच्या कर्मचाऱ्यांचा सहभाग आहे. अपघातात मृत्यू झालेल्या सात जणांची ओळख पटवण्याचे काम सुरू आहे. दरम्यान, पोलीस अपघाताच्या कारणांचा तपास करत असून घटनास्थळावरून मिळणाऱ्या माहितीनुसार पुढील तपशील समोर येणार आहे.