Hemant Soren: झारखंडमध्ये सत्ता परिवर्तनाची तयारी सुरू, हेमंत सोरेन पुन्हा मुख्यमंत्रिपदाची धुरा हाती घेणार?

हेमंत सोरेन पुन्हा एकदा झारखंडचे मुख्यमंत्री होणार आहेत, अशी माहिती समोर आली आहे. झारखंड मुक्ती मोर्चा, काँग्रेस आणि आरजेडीच्या विधिमंडळ पक्षांच्या बैठकीत हेमंत सोरेन यांची पुन्हा एकदा सरकारच्या प्रमुखपदी निवड करण्यात आली आहे, अशी माहिती अधिकृत सूत्रांनी दिली आहे. कथित जमीन घोटाळ्यात सोरेन यांच्या अटकेनंतर मुख्यमंत्री झालेल्या चंपाई सोरेन राजीनामा देणार आहेत. त्यांना जेएमएम पक्षाचं कार्याध्यक्ष बनवलं जाऊ शकतं. सध्या हेमंत सोरेन हे सत्ताधारी झारखंड मुक्ती मोर्चाचे (जेएमएम) कार्याध्यक्ष आहेत.

जमीन घोटाळ्याशी संबंधित मनी लाँड्रिंग प्रकरणात हायकोर्टातून जामीन मिळाल्यानंतर 28 जून रोजी हेमंत सोरेन यांची तुरुंगातून सुटका झाली. अटकेनंतर हेमंत सोरेन यांनी मुख्यमंत्रिपदाचा राजीनामा दिला होता.

यानंतर त्यांचे निकटवर्तीय आणि मंत्री चंपाई सोरेन यांच्याकडे राज्याची सूत्रे सोपवण्यात आली होती. चंपाई यांनी 2 फेब्रुवारी रोजी राज्याचे 12 वे मुख्यमंत्री म्हणून शपथ घेतली होती.

सोरेन हे तुरुंगाबाहेर आल्यापासून ते पुन्हा एकदा मुख्यमंत्री होती, अशी चर्चा सुरू होती. 1,500 शिक्षकांना नियुक्ती पत्र वाटप कार्यक्रमासह मुख्यमंत्री चंपाई सोरेन यांचे सर्व महत्त्वाचे कार्यक्रम अचानक रद्द करण्यात आले आहे. यामुळेच काही मोठा निर्णय घेतला जाण्याची शक्यता वर्तवली जात होती. मंगळवारीही त्यांचे सर्व सार्वजनिक कार्यक्रम रद्द करण्यात आले होते.

दरम्यान, येत्या काही महिन्यांवर विधानसभा निवडणुका होणार असताना राज्यात नेतृत्व बदल होत आहे. नुकत्याच झालेल्या लोकसभा निवडणुकीत युतीने चांगली कामगिरी केली आहे. तुरुंगातून सुटल्यानंतर हेमंत सोरेन भाजपवर आक्रमक झाले. विधानसभेतही ते भाजपचा पराभव करण्यासाठी आतापासूनच योजना आखत आहेत.