Manoj Jarange Patil : मनोज जरांगेंना 'ओबीसीं'कडून नाही तर कोणाकडून धोका?; ओबीसी नेत्यांच्या विधानाने खळबळ

अक्षय शिंदे, साम टीव्ही प्रतिनिधी

ड्रोन कॅमेराचा खोडसाळपणा जरांगेच्याच लोकांनी केला असेल, ड्रोनवरून दिशाभूल करून काहीतरी पदरात पाडून घेण्याचा प्रोग्राम असू शकतो, असा गंभीर आरोप ओबीसी नेते नवनाथ वाघमारे यांनी केला आहे. जरांगेंना भीती वाटत असेल तर त्यांनी संरक्षण घेतलं पाहिजे, आमचा त्याला विरोध नाही, असंही वाघमारे यांनी म्हटलंय.

यावेळी नवनाथ वाघमारे यांनी शरद पवार यांनी आरक्षणाबाबत त्यांची नक्की भूमिका काय आहे? ती जाहीर करावी. त्यांचे नेते राजेश टोपे सभागृहात सगे सोयरेची अंमलबजावणी करण्याची मागणी करत असल्याने ती त्यांची व्यक्तिगत भूमिका आहे का ? असा सवाल त्यांनी उपस्थित केला आहे.

मराठा नेते जरांगे पाटील यांच्या जालना जिल्ह्यातील आंतरवाली सराटी गावात मागच्या काही दिवसांपासून ड्रोन घिरट्या घालत असल्याचं समोर आलं आहे. ग्रामस्थांनी यासंदर्भात पोलिसांकडे तक्रार केली आहे. त्यावर मनोज जरांगें पाटील संतापले आहेत. अंतरवाली सराटीत ड्रोन घिरट्या घातल आहेत. तुमच्या जिवाला धोका आहे असं तुम्हाला वाटतं का? असा प्रश्न पत्रकारांनी त्यांना विचारला होता. त्यावर मनोज जरांगे यांनी, मला मारणे एवढे सोपे नाही. माझ्या मागे राज्यातील ६ कोटी मराठा बांधव आहेत. जो कोणी ड्रोन उडवून हे काम करण्याचा प्रयत्न करत आहे. त्याने आमच्या नादी लागू नये. ड्रोन आले होते. ते खूपच उंचावर होतं. ड्रोन टप्प्यात आला तर त्याला खाली पाडणार, असा इशाराही जरांगे यांनी दिला होता.

अंतरवाली सराटीत ड्रोन गिरट्या घालत असल्याच्या प्रकारावर आज ओबीसी नेते नवनाथ वाघमारे यांनी मनोज जरांगेंवरच संशय घेतल्यामुळे खळबळ माजली आहे. ड्रोन कॅमेराचा खोडसाळपणा जरांगेच्याच लोकांनी केला असेल, ड्रोनवरून दिशाभूल करून काहीतरी पदरात पाडून घेण्याचा प्रोग्राम असू शकतो, असा गंभीर आरोप त्यांनी केला आहे.