रात्री नुडल्स खाऊन कुटंब झोपलं अन्....; ५ जणांच्या मृत्यू प्रकरणात मोठा ट्विस्ट

उत्तर प्रदेशातील ग्रेटर नोएडा येथे एकाच कुटुंबातील पाच जणांचा मृत्यू झाल्याने परिसरात खळबळ उडाली आहे. शुक्रवारी रात्री महेश, त्यांची पत्नी ललिता आणि तीन मुलांनी नुडल्स खाल्ले आणि त्यानंतर ते झोपायला गेले. शनिवारी सकाळी त्यांच्या खोलीत पाचही जणांचे मृतदेह आढळले. सुरुवातीला या घटनेमागे अन्नातून विषबाधा झाल्याचा संशय व्यक्त करण्यात आला होता. मात्र, पोलिसांच्या तपासात विषप्रयोगाचा संशय समोर आला आहे.

मिळालेल्या माहितीनुसार, या पाचही जणांचा मृत्यू अन्नातून विषबाधा झाल्याने नव्हे, तर विषप्रयोगामुळे झाल्याचा प्राथमिक अंदाज आहे. एनडीटीव्हीच्या वृत्तानुसार, महेशनेच नूडल्समध्ये विष मिसळल्याची माहिती पोलीस सूत्रांनी दिली आहे. महेशच्या मोबाईलमध्ये एक ऑडिओ रेकॉर्डिंग आढळले असून, त्यात त्याने आपल्या मृत्यूला दोन बहिणी आणि मेहुण्याला जबाबदार धरल्याचे सांगितले जात आहे. या प्रकरणात पोलिसांनी महेशच्या दोन बहिणी आणि मेहुण्याला अटक केली आहे.

मालमत्तेच्या वादातून पाच जणांचा मृत्यू?

रबूपुरा पोलीस ठाण्याचे प्रभारी सुजीत उपाध्याय यांनी सांगितले की, नातेवाइकाने दिलेल्या तक्रारीच्या आधारे मृत महेशच्या दोन बहिणी आणि मेहुण्याला अटक करण्यात आली आहे. प्राथमिक तपासात मालमत्तेच्या वादातून ही घटना घडली असण्याची शक्यता व्यक्त करण्यात येत आहे. पोलिसांनी दिलेल्या माहितीनुसार, शवविच्छेदन अहवालात विषप्रयोगाचे संकेत मिळाले आहेत. त्यामुळे मृतांचे व्हिसेरा नमुने फॉरेन्सिक तपासणीसाठी पाठवण्यात आले आहेत. या तपासणीचा अहवाल आल्यानंतर मृत्यूचे नेमके कारण स्पष्ट होईल, असे पोलिसांनी सांगितले. महेश, त्यांची पत्नी ललिता (वय 35), मुलगी मिष्टी (वय 7) आणि मुलगे लड्डू (वय 11) व साक्षात (वय 3) यांचे मृतदेह शनिवारी सकाळी रबूपुरा परिसरातील नगला श्री पदम गावातील त्यांच्या घरात आढळले होते.

पोलिसांच्या प्राथमिक तपासात महेश मानसिक तणाव आणि नैराश्यात असल्याची शक्यताही व्यक्त केली जात आहे. याच परिस्थितीत त्याने कुटुंबासह आत्मघातकीचे पाऊल उचलले असावे, असा संशय तपास यंत्रणांकडून व्यक्त करण्यात येत आहे. मात्र, घटनेमागील नेमके कारण आणि मृत्यूची परिस्थिती तपास पूर्ण झाल्यानंतरच स्पष्ट होणार आहे.

पोलिसांकडून आरोपींची चौकशी सुरू असून, मोबाईलमधील ऑडिओ रेकॉर्डिंगसह इतर पुराव्यांचीही तपासणी केली जात आहे. नोएडाचे एसीपी राजीव सिसोदिया यांनी सांगितले की, मृतदेहांचे शवविच्छेदन करण्यात आले असून व्हिसेरा नमुने सुरक्षित ठेवण्यात आले आहेत. तपासातून लवकरच संपूर्ण घटनाक्रम स्पष्ट होईल, असेही त्यांनी सांगितले.