Tamil Nadu Hospital Fire : खासगी रुग्णालयात भीषण आग ; 7 जणांचा होरपळून मृत्यू, 20 जण जखमी

तामिळनाडूतील दिंडीगुल येथील एका खासगी रुग्णालयात भीषण आग लागली. या दुर्घटनेत सात जणांचा होरपळून मृत्यू झाला. तर 20 जण जखमी झाले आहेत. मृतांमध्ये आणि दोन महिलांचा समावेश असल्याची माहिती स्थानिक प्रशासनाने दिली.

मिळालेल्या माहितीनुसार, रुग्णालयाच्या तळमजल्यावर रिसेप्शन जवळ ही आग लागली. शॉर्टसर्किटमुळे ही आग लागल्याचा प्राथमिक अंदाज व्यक्त करण्यात येत आहे.

धुराचे लोट इतर मजल्यांवर प्रचंड वेगाने पसरले. अग्निशमन दलाच्या माहितीनुसार, रुग्णालयच्या संपूर्ण इमारतीत धुराचे लोट पसरल्याने रुग्णांना श्वास घेण्यास त्रास होऊ लागला. धुरामुळे गुदमरून त्यांचा मृत्यू झाला.

अधिकाऱ्यांच्या माहितीनुसार, रुग्णालयातील इतर रुग्णांना सुरक्षित बाहेर काढण्यात आले आहे. तसेच त्यांना उपचारासाठी नजीकच्या रुग्णालयात दाखल करण्यात आले आहे.

प्रचंड गोंधळ उडाला

दिंडीगुल येथील खासगी रुग्णालयात शॉर्ट्सर्किटमुळे आग लागली. सगळीकडे धुराचे लोट पसरले. अचानक आग लागल्याने प्रचंड गोंधळ उडाला होता. अगीच्या घटनेची माहिती मिळाल्यानंतर स्थानिक प्रशासन आणि अग्निशमन दलाचे जवान घटनास्थळी पोहचले. त्यांनी तात्काळ बचावकार्य हाती घेतले. अग्निशमन दलाच्या जवानांकडून आग आटोक्यात आणण्यासाठी शर्थीचे प्रयत्न सुरु होते.