Election 2026 : गुजरातसह ३ राज्यात विधानसभेची पोटनिवडणूक जाहीर, आयोगाने वेळापत्रक केलं जाहीर

राजकारणातून मोठी बातमी समोर आली आहे. निवडणूक आयोगाने (ECI) बिहार, गुजरात आणि मध्य प्रदेश या तीन राज्यांतील रिकाम्या झालेल्या विधानसभा जागांसाठी पोटनिवडणुकांची घोषणा केली आहे. या पोटनिवडणुकांसाठी ३० जुलै २०२६ रोजी मतदान होणार असून, मतमोजणी व निकाल ४ ऑगस्टपर्यंत जाहीर करण्यात येणार आहेत.

निवडणूक आयोगानुसार बिहारमधील बांकीपुर, गुजरातमधील मंजलपूर आणि मध्य प्रदेशमधील दतिया या विधानसभा मतदारसंघांमध्ये पोटनिवडणूक घेण्यात येणार आहे. संबंधित मतदारसंघांतील जागा विविध कारणांमुळे रिक्त झाल्याने ही निवडणूक घेण्यात येणार असल्याचं म्हटलं जात आहे. या निवडणुकांसाठी उमेदवारी अर्ज दाखल करण्याची अंतिम तारीख १३ जुलै २०२६ असून दाखल झालेल्या अर्जांची छाननी १४ जुलै रोजी होईल, तर उमेदवारी अर्ज मागे घेण्याची अंतिम मुदत १६ जुलै असेल. त्यानंतर निवडणूक प्रचाराला वेग येणार असून ३० जुलै रोजी मतदान प्रक्रिया पार पडेल.

दरम्यान बिहारमधील बांकीपुर विधानसभा मतदारसंघाची जागा ३० मार्च २०२६ रोजी रिक्त झाली होती.आमदार नितीन नवीन यांनी राजीनामा दिल्यानंतर ही जागा रिक्त राहिली होती. त्यामुळे त्या मतदारसंघात पोटनिवडणूक घेण्याचा निर्णय घेण्यात आला आहे. तसेच गुजरातमधील मंजलपूर मतदारसंघाचे आमदार योगेशभाई नरनदास पटेल यांचे २ जून २०२६ रोजी निधन झाले. त्यांच्या निधनानंतर रिक्त जागा भरण्यासाठी निवडणूक आयोगाने पोटनिवडणूक जाहीर केली आहे. गुजरात सरकारने यासंदर्भातील अधिसूचना प्रसिद्ध केली आहे.

मध्य प्रदेशातील दतिया विधानसभा मतदारसंघाची जागा २ एप्रिल २०२६ रोजी रिक्त झाली. आमदार राजेंद्र भारती यांना अपात्र ठरवण्यात आल्यानंतर ही जागा रिक्त झाली होती. जनप्रतिनिधित्व कायदा १९५१ मधील कलम ८ तसेच भारतीय राज्यघटनेच्या कलम 191(1)(e) अंतर्गत ही कारवाई करण्यात आल्याचे आयोगाने स्पष्ट केले आहे. निवडणूक आयोगाने संबंधित राज्य सरकारांना अधिसूचना प्रसिद्ध करण्याचे निर्देश दिले असून, रिक्त झालेल्या जागांवर लोकप्रतिनिधी निवडून देण्यासाठी ही पोटनिवडणूक होत असल्याचे सांगितले आहे. आता या तीनही मतदारसंघांतील राजकीय घडामोडींना वेग येण्याची शक्यता आहे.