Accident News : महामार्गावर बिझनेसमेनचा अपघाती मृत्यू; व्यावसायिक क्षेत्रात शोककळा

दिल्ली-मुंबई एक्सप्रेसवेवर एक भीषण अपघात झाला. या अपघातात राजस्थानमधील प्रसिद्ध उद्योगपती वल्लभ महेश्वरी यांचा मृत्यू झाला. हा अपघात राजस्थानमधील अलवर शहराजवळ बीएमडब्ल्यू कारवरील नियंत्रण सुटल्याने हा अपघात घडल्याची माहिती समोर आली आहे. या अपघातानंतर त्यांच्या कुटुंबावर दुःखाचा डोंगर कोसळला आहे.

मिळालेल्या माहितीनुसार, शकुन ग्रुपचे व्यवस्थापकीय संचालक (MD) वल्लभ महेश्वरी हे रविवारी जयपूरहून मथुराकडे जात होते. त्यावेळी अलवर जिल्ह्यातील रेणी पोलीस ठाण्याच्या हद्दीत सायंकाळी सुमारे ४ वाजण्याच्या सुमारास त्यांच्या बीएमडब्ल्यू कारवरील चालकाचा ताबा सुटला.

त्यानंतर, गाडीने रस्त्यावरील बॅरिकेड्स तोडत मधल्या डिव्हायडरला धडक दिली आणि पुढे जाऊन पुलाच्या भिंतीवर जोरात आदळली. हा अपघात इतका भीषण होता की, कारचा अक्षरशः चुराडा झाला. अपघातानंतर महेश्वरी आणि चालकाला तातडीने पिनान रुग्णालयात दाखल करण्यात आले. त्यानंतर त्यांना पुढील उपचारांसाठी अलवर येथील हरिश रुग्णालयात हलवण्यात आले. मात्र, डॉक्टरांनी उपचारादरम्यान महेश्वरी यांना मृत घोषित केले. या अपघातात चालक सुदैवाने वाचला असल्याची माहिती पोलिसांनी दिली.

वल्लभ महेश्वरी हे जयपूरस्थित शकुन ग्रुपचे व्यवस्थापकीय संचालक होते. २००० च्या दशकाच्या सुरुवातीला स्थापन झालेल्या या उद्योगसमूहाने जाहिरात, पायाभूत सुविधा, रिअल इस्टेट आणि हॉस्पिटॅलिटी अशा विविध क्षेत्रांमध्ये काम केले आहे. व्यवसाय व्यवस्थापन आणि कॉर्पोरेट क्षेत्रातील त्यांना ३२ वर्षांहून अधिक अनुभव होता. एसजीएम बिल्डकॉन प्रायव्हेट लिमिटेड, शकुन कम्युनिकेशन इन्फ्रास्ट्रक्चर प्रायव्हेट लिमिटेड , शकुन अ‍ॅडव्हर्टायझिंग प्रायव्हेट लिमिटेड आणि मनोकामना रिअल इस्टेट प्रायव्हेट लिमिटेड यांसारख्या अनेक कंपन्यांमध्ये त्यांनी संचालक म्हणून काम पाहिले होते.