काँग्रेस अन् भाजप कार्यकर्त्यांमध्ये थेट लाठ्याकाठ्यांनी हाणामारी; एकमेकांची डोकी फोडली

बिहारची राजधानी पाटणा येथे भाजप आणि काँग्रेस कार्यकर्त्यांमध्ये जोरदार हाणामारी झाल्याची घटना समोर आली आहे. लोकसभेचे विरोधीपक्षनेते राहुल गांधी यांनी केलेल्या आंदोलनाचे पडसाद आता ठिकठिकाणी उमटत असताना याच पार्श्वभूमीवर पाटणाच्या काँग्रेस कार्यालयाबाहेर मोठा राडा झाल्याचे पाहायला मिळाले.

काँग्रेसच्या मुख्य कार्यालयाला भाजप कार्यकर्त्यांनी घेराव घालण्यास सुरुवात केली होती. त्याचवेळी त्याठिकाणी उपस्थित काँग्रेस कार्यकर्त्यांशी त्यांची शाब्दिक चकमक झाली. पाहता पाहता हा वाद इतका टोकाला गेला की दोन्ही बाजूंनी दगडफेक आणि लाठीमार सुरू झाला. यावेळी भाजपच्या कार्यकर्त्यांची डोकी देखील फोडली आणि मोठ्या प्रमाणात रक्तस्त्राव देखील डोक्यातून सुरू होता. परिस्थिती नियंत्रणाबाहेर जात असल्याचे पाहून पोलिसांनी अधिकचा फौजफाटा त्याठिकाणी बोलवत मोठा बंदोबस्त तैनात केला.

हे आंदोलन राहुल गांधी आणि काँग्रेसने केलेल्या आंदोलनाच्या विरोधात भाजपने जाहीर केलेल्या देशव्यापी आंदोलनाचा भाग होता. या लाठाकाठ्यांच्या मारहाणीच्या प्रकरणानंतर परिसरात भीतीचे वातावरण निर्माण झाले आहे. दरम्यान राहुल गांधी, प्रियांका गांधी वाड्रा आणि काँग्रेसच्या इतर नेत्यांनी नवी दिल्ली येथे पंतप्रधान मोदी यांच्या निवासस्थानाबाहेर NEET पेपरफुटी आणि तरूणांवर करण्यात आलेल्या लाठीचार्जच्या विरोधात ठिय्या मांडला होता. त्यानंतर त्यांना पोलिसांनी ताब्यात घेत दोनतीन तासांनी त्यांची सुटका केली होती.

या पार्श्वभूमीवर भाजपने काँग्रेस विरोधात देशभर आंदोलन करण्याचा निर्णय घेतला होता. पाटणा येथील तणावपूर्ण परिस्थिती लक्षात घेऊन पोलिसांनी काँग्रेस मुख्यालय आणि आसपासच्या भागात पोलिसांचा फौजफाटा उभा केला आहे.