Political News : निवडणुकीपूर्वी NDA ला मोठा झटका, बड्या नेत्याने दिला तडकाफडकी राजीनामा

Politics News : विधानसभा निवडणुकीपूर्वी भारतीय जनता पक्षाच्या नेतृत्त्वाखाली एनडीए आघाडीला मोठा धक्का बसला आहे. एनडीएमधील जेडीयू पक्षातील एका बड्या नेत्याने राजीनामा देण्याची तयारी केल्याची माहिती समोर आली आहे. याआधी माजी मंत्री लक्ष्मेश्वर राय यांनी पक्ष सोडला होता. लागोपाठ मोठे नेते जेडीयू पक्षातून बाहेर पडत असल्याने एनडीएला धक्का बसल्याचे म्हटले जात आहे.

मिळालेल्या माहितीनुसार, नितीश कुमार यांच्या जनता दल युनायटेडमधून (जेडीयू) संतोष कुशवाहा यांनी बाहेर पडण्याचा निर्णय घेतला आहे. आज ते (१० ऑक्टोबर) जेडीयूचा राजीनामा देत तेजस्वी यादव यांच्या राष्ट्रीय जनता दलात प्रवेश करणार असल्याची माहिती समोर आली आहे. संतोष कुशवाहा यांनी तेजस्वी यांच्या पक्षांतून निवडणूक लढवण्यासाठी त्यांची जागा देखील निश्वित केली आहे.

नितीश कुमार यांच्या जेडीयूमध्ये दुर्लक्ष होत असल्याचा आरोप संतोष कुशवाहा यांनी केला आहे. यामुळे ते मागील काही काळापासून नाराज होते. या नाराजीमुळेच त्यांनी आता जेडीयूमधून बाहेर पडत राष्ट्रीय जनता दलात जाण्याचा निर्णय घेतला आहे. यामुळे जेडीयूसोबत एनडीए आघाडीलाही मोठा धक्का बसला आहे.

२०१४ आणि २०१९ च्या लोकसभा निवडणुकीत संतोष कुशवाहा जेडीयूकडून खासदार म्हणून निवडून आले होते. त्याआधी ते २०१० मध्ये भाजपचे आमदार होते. २०१३ मध्ये कुशवाहा भाजप सोडून जेडीयूमध्ये सामील झाले होते. आता जेडीयूमध्ये दुर्लक्ष होत असल्याने संतोष कुशवाहा हे राष्ट्रीय जनता दल म्हणजेच राजदमध्ये प्रवेश करणार आहेत.