इंडिया आघाडीला मोठा धक्का; ३० खासदार असलेल्या पक्षाने फिरवली महत्त्वाच्या बैठकीकडे पाठ

इंडिया आघाडीला मोठा धक्का बसला आहे. डीएमके पक्षाने इंडिया आघाडीच्या ८ जून रोजी होणाऱ्या बैठकीत सहभागी न होण्याचा निर्णय घेतला आहे. लोकसभेत २२ आणि राज्यसभेत ८ खासदार असलेल्या डीएमके पक्षाने काँग्रेसवर नाराजी दर्शवत बैठकीत उपस्थित राहणार नसल्याचे स्पष्ट केले.

द्रविड मुनेत्र कडगम पक्षाने गुरुवारी स्पष्ट केलं की, 'तामिळनाडू विधानसभा निवडणुकीनंतर काँग्रेसने घेतलेल्या भूमिकेला 'विश्वासघात' केल्याची टीका केली. कार्यकर्त्यांच्या भावना लक्षात घेत आमचा पक्ष ८ जून रोजी इंडिया आघाडीच्या बैठकीत सहभागी होणार नाही. विधानसभा निवडणुकीच्या काळात काँग्रेस पक्षाने केलेल्या विश्वासघातामुळे आमचे कार्यकर्ते दुखावले आहेत, असं पक्षाने निवेदनात म्हटलं आहे.

'डीएमके'ने निवेदनात पुढे स्पष्ट केलं की, 'आमचा पक्ष या बैठकीत सहभागी होणार नाही. परंतु देशाशी संबंधित मुद्द्यांसाठी आवाज उचलत राहील. या बैठकीत सहभागी होणाऱ्या पक्षांनी राष्ट्रहित आणि जनकल्याणाचे मुद्दे हाती घेतल्यास आम्ही त्यांचं समर्थन करू. त्यावेळी आमच्या भूमिका देखील स्पष्टपणे मांडू'.

डीएमके काँग्रेसवर नाराज का झाली?

तामिळनाडू विधानसभा निवडणुकीत टीव्हीके पक्षाने सर्वाधिक १०८ जागा जिंकल्या आहेत. त्यानंतर काँग्रेसने टीव्हीके पक्षाला समर्थन दिलं होतं. काँग्रेसच्या पाच आमदारांनी थलपती विजय यांच्या टीव्हीके पक्षाला सत्ता स्थापनेसाठी पाठिंबा दिला होता. परंतु काँग्रेसच्या याच भूमिकेवरून डीएमके पक्षाने नाराजी दर्शवली.

विधानसभा निवडणुकीनंतर काँग्रेसच्या भूमिकेनंतर डीएमके पक्षाने लोकसभेत त्यांच्या खासदारांची आसनव्यवस्था बदलण्याची मागणी केली होती. यावरून दोन्ही पक्षात ठिणगी पडल्याचे पहिल्यांदा स्पष्ट झाले होते. आता दोन्ही पक्षांत दिवसेंदिवस दुरावा वाढताना दिसत आहे. डीएमके पक्षाच्या मागणीला आज अधिकृत परवानगी मिळाली. त्यामुळे लोकसभेत काँग्रेस आणि डीएमके खासदार वेगवेगळे बसल्याचे पाहायला मिळतील.