बड्या नेत्याने भाजप फोडला; राज्य सचिवाचा तडकाफडकी राजीनामा, राजकारण फिरणार?

तामिळनाडूच्या राजकारणात मोठी उलथापालथ होताना दिसत आहे. काही दिवसांपूर्वी अन्नामलाई यांनी भाजपची साथ सोडली. अन्नामलाई यांच्यानंतर तामिळनाडूत भाजपला लागलेली गळती सुरूच आहे. अन्नामलाई यांच्यानंतर आता भाजपचे तामिळनाडू राज्य सचिव अमर प्रसाद रेड्डी यांनी पक्षाच्या प्राथमिक सदस्यत्वाचा राजीनामा दिला आहे.

भाजपमध्ये मागील १३ वर्षांपासून काम करणाऱ्या अमर प्रसाद रेड्डी यांनी पक्षासोबतचं जुनं नातं संपवलं आहे. अमर प्रसाद रेड्डी हे तामिळनाडूतील भाजपचा सक्रिय आणि प्रमुख चेहरा मानला जायचा. अन्नामलाई यांच्यानंतर अमर प्रसाद रेड्डी यांच्या रुपाने भाजपला दुसरा मोठा धक्का बसला आहे.

सोशल मीडियावर निर्णय जाहीर करताना अमर प्रसाद रेड्डी यांनी म्हटलं की, मी अन्नामलाई यांच्यासोबत नव्या राजकीय प्रवासाला सुरुवात करणार आहे. मी भाजपचा राजीनामा दिला आहे. भाजपला राजीनामा दिल्यानंतर आता पुढील राजकीय वाटचाल ही अन्नामलाई यांच्यासोबत करणार आहे'.

कोण आहेत अमर प्रसाद रेड्डी?

अमर प्रसाद रेड्डी यांनी २०१३ साली भाजपमध्ये प्रवेश केला. रेड्डी यांनी पक्षाच्या क्रीडा आणि कौशल्य विकास विभागाचे संयोजक म्हणूनही भूमिका बजावली. त्यांनी मोदी कबड्डी लीगचेही आयोजन केलं होतं. या स्पर्धेत ६०,००० हून अधिक युवकांनी सहभाग नोंदवला होता. 'एन मन एन मक्कल यात्रेचे मुख्य आयोजक म्हणूनही भूमिका बजावली आहे. त्यानंतर त्यांनी आज बुधवारी भाजपला रामराम ठोकला. त्यांनी तब्बल १३ वर्षांची साथ सोडून नवा मार्ग निवडला आहे.

भाजपचे तामिळनाडू उपाध्यक्ष करुणा नागराजन यांनी पक्ष सोडताना शुक्रवारी म्हटलं होतं की, भाजपला राजीनामा देऊन अन्नामलाई यांना साथ देणार आहे. मी माझ्या शेकडो समर्थकांसह भाजपच्या प्राथमिक सदस्यात्वाचा राजीनामा दिला आहे. त्यानंतर अन्नामलाई यांच्या राजकीय आंदोलनात सहभागी होणार आहे.