Amit Shah : खटाखट आश्वासनं देऊन विदेशात जातात; अमित शहांचा राहुल गांधींवर हल्लाबोल

केंद्रीय गृहमंत्री अमित शहा यांनी शनिवारी झारखंडमध्ये मधुपूरच्या एका प्रचारसभेला संबोधित केलं. राज्यातील झारखंड मुक्ती मोर्चा सरकार आणि काँग्रेसवर त्यांनी जोरदार हल्ला चढवला. हे दोन्ही पक्ष घुसखोरांना प्रोत्साहन आणि त्यांचा बचाव करत असल्याचा गंभीर आरोप शहा यांनी केला.

एकदा भाजपचं सरकार आणा मग या घुसखोरांना शोधून काढणार, असा कडक इशाराही त्यांनी यावेळी दिला. जोपर्यंत विधानसभेत भाजपचा आमदार आणि संसदेत भाजपचा खासदार आहे, तोपर्यंत मुस्लिमांना आरक्षण मिळू शकत नाही, असा पुनरुच्चारही अमित शहांनी यावेळी केला.

घुसखोरीच्या मुद्द्यावरून निशाणा

मी आलोय तर सर्वात आधी घुसखोरीवर बोलणार आहे. हे घुसखोर आदिवासी बहिणींसोबत तिसरं-चौथं लग्न करतात आणि त्यांच्या जमिनी लाटतात. गुन्हेगारी वाढते आणि तुमचा रोजगारही हिसकावून घेतात. घुसखोरी फक्त आदिवासींची समस्या नाहीत, तर येथील प्रत्येक तरुणाची समस्या आहे. हेमंत सोरेन आणि काँग्रेस या घुसखोरांना रोखण्याऐवजी आपली व्होटबँक मानतात. एकदा का भाजपचं पूर्ण बहुमताचं सरकार येऊ द्या, मग एकेकाला शोधून काढतो, असा इशाराही अमित शहांनी प्रचारसभेत दिला.

राहुल गांधींवर टीकास्त्र

काँग्रेस पक्षाचे नेते राहुल गांधी हे आश्वासने देऊन परदेशात पळून जातात. भाजपच असा पक्ष आहे, जो दिलेली गॅरंटी पूर्ण करतो, असं अमित शहांनी ठामपणे सांगितले.

अलीकडेच काँग्रेसचे अध्यक्ष मल्लिकार्जुन खरगे कार्यकर्त्यांना म्हणाले की, आश्वासने अशी द्या की ते पूर्ण केले पाहिजेत. हे असं का बोलावं लागलं. कारण त्यांनी कर्नाटकात आश्वासने दिली, तेलंगणात आश्वासने दिली. पण ती पूर्ण करू शकले नाहीत. हे राहुल गांधी आहेत. आश्वासने देऊन निघून जातात. खटाखट, फटाफट आश्वासने देतात आणि पुन्हा येत नाहीत. परदेशात निघून जातात. पण तुम्हाला ठाऊक आहे की मोदींनी दिलेली आश्वासने म्हणजे दगडावरची रेघ आहे, असेही शहा म्हणाले.

जेव्हा घुसखोर गावात येतात, तेव्हा तुमचा तलाठी काय करतो, पोलीस काय करतात? यांना रेशन कार्ड कोण देतं? आदिवासी मुलींच्या जमिनी यांच्या नावावर कोण करून देतं? हेमंत सोरेन यांची उलटगणती सुरू झाली आहे. घुसखोरांनो, २३ तारखेपर्यंत मजा करून घ्या. त्यानंतर तुम्हाला शोधून बाहेर काढणार, असंही अमित शहा म्हणाले.