Crime: दुचाकीला कट मारल्याचा राग डोक्यात गेला, तरुणाला दगड अन् लोखंडी रॉडने हात-पाय तुटेपर्यंत मारहाण

• अंबरनाथमध्ये दुचाकीला कट लागल्यावरून कडाक्याचे भांडण

• तरुणाला हात-पाय तुटेपर्यंत बेदम मारहाण

• दगड आणि लोखंडी रॉडने तरुणावर जीवघेणा हल्ला

• पोलिसांनी आरोपींविरोधात गुन्हा दाखल करत शोध सुरू केला

अजय दुधाने, अंबरनाथ

अंबरनाथमध्ये दुचाकीला कट लागल्याच्या रागातून तरुणाला बेदम मारहाण करण्यात आल्याची धक्कादायक घटना समोर आली आहे. या मारहाणीत तरुणाचा हात आणि कंबर फ्रॅक्चर झाली आहे. जुन्या वादातून ही घटना घडली. भांडण मिटवण्यासाठी तरुणाला मैदानात बोलावण्यात आले. त्यानंतर दोघांनी हात-पाय तुटेपर्यंत त्याला बेदम मारहाण केली. या मारहाणीत गंभीर जखमी झालेल्या तरुणावर सध्या रुग्णालयात उपचार सुरू आहेत. या प्रकरणी पोलिसांनी दोन आरोपींविरोधात गुन्हा दाखल करत त्यांचा शोध सुरू केला आहे.

मिळालेल्या माहितीनुसार, अंबरनाथच्या स्वामीनगरमध्ये राहणाऱ्या विश्वा शिवलिंगम आणि याच परिसरात राहणाऱ्या करण बाबर या दोघांचा रविवारी दुपारी बाईकला कट मारण्यावरून वाद झाला होता. रविवारी संध्याकाळी विश्वाला करण बाबर आणि त्याचा मित्र तुषार गिरी यांनी जुन्या भेंडीपाड्याच्या मैदानात वाद मिटवण्यासाठी बोलावलं.

मात्र तिथे गेल्यानंतर करण बाबरसह साहिल सय्यद, नुमान सय्यद आणि तुषार गिरी यांनी विश्वा शिवलिंगम याच्यासह त्याचे मित्र मंथन सिंग, रोहित स्वामी, साईनाथ, शक्ती, महेश्वर यांना दगडाने आणि लोखंडी रॉडने मारहाण केली.

यावेळी इतर जणांनी घटनास्थळावरून पळ काढला. तर मंथन सिंग हा एकटाच मारहाण करणाऱ्यांच्या हाती सापडला. त्याला या सर्वांनी मिळून बेदम मारहाण केली आणि तो मेला असं समजून तिथेच टाकून देत सर्वांनी तिथून पळ काढला. या मारहाणीत मंथन सिंग याचा हात, कंबर फ्रॅक्चर झाली असून जबड्यालाही गंभीर दुखापत झाली आहे.

त्याच्यावर सध्या उल्हासनगरच्या मध्यवर्ती रुग्णालयात आयसीयूत उपचार सुरू आहेत. या प्रकरणात पोलिसांनी मारहाणीचा गुन्हा दाखल केला असला तरी कलम वाढण्याचीही शक्यता आहे. पोलिस सध्या फरार आरोपींचा शोध घेत आहेत. या घटनेमुळे अंबरनाथमध्ये एकच खळबळ उडाली.