Kalyan News : अन् मस्करीची झाली कुस्करी! महिलेचा तिसऱ्या मजल्यावरून पडून मृत्यू , कल्याणमधील धक्कादायक घटना

अभिजीत देशमुख, साम टीव्ही प्रतिनिधी

कल्याण : कल्याणजवळील डोंबिवलीमधून धक्कादायक घटना समोर आली आहे. मित्रांसोबत मस्करी करताना एका महिलेचा तिसऱ्या मजल्यावरून पडून मृत्यू झाला आहे. या घटनेने कल्याण-डोंबिवली परिसरात एकच खळबळ उडाली आहे. या प्रकरणाचा मानपाडा पोलिसांनी तपास सुरु केला आहे.

मित्रांसोबत मस्करी करत असताना एका महिलेचा इमारतीच्या तिसऱ्या मजल्यावरून पडून एका महिलेचा मृत्यू झाल्याची घटना डोंबिवली कल्याण शीळ रोडवर घडली. नगीना देवी नगीनादेवी मंजिराम असे या महिलेचे नाव आहे. या इमारतीमध्ये सफाईचे काम करत असल्याची माहिती मिळत आहे. ही महिला पिसवली टाटा नाका परिसरात कुटुंबासह राहत होती. या प्रकरणी मानपाडा पोलिसांनी नोंद करत पुढील तपास सुरू केला आहे.

नेमकं काय घडलं?

डोंबिवली पूर्व कल्याण शीळ रोडवर विकास नाका परिसरात ग्लोब स्टेट नावाची इमारत आहे. या इमारतीमधील एका कार्यालयात नगीनादेवी मंजिराम ही महिला साफसफाईचे काम करते. नगीनादेवी डोंबिवली पूर्वेतील पिसवली परिसरात राहते. तिला एक मुलगा आणि एक मुलगी आहे.

आज दुपारच्या सुमारास नगीनादेवी तिच्या सहकाऱ्यांसोबत इमारतीच्या तिसऱ्या मजल्यावर जिन्याजवळ बसली होती. ती बसली असताना तिचा सहकारी तिच्यासोबत मस्करी करीत होता. याच दरम्यान तिच्या सहकाऱ्याचा हात तिला लागला आणि त्यांचा तोल गेला.

दोघांचा तोल गेल्याने क्षणार्धात नगीनादेवी तिसऱ्या मजल्यावरुन खाली पडली. याचवेळी तिच्या सोबत मस्ती करणारा बंटी नावाच्या तरुणाचाही तोल गेला. मात्र त्याला आजूबाजूला उभे असलेल्या लोकांनी वाचविले. या प्रकरणाची माहिती मिळताच मानपाडा पोलीस घटनास्थळी पोहोचले. या प्रकरणी मानपाडा पोलिसांनी नोंद करत पुढील तपास सुरु केला आहे.