Pune News: तुकाराम मुंढेंच्या FDA ची मोठी कारवाई, पुण्यातील वैशाली अन् रुपाली हॉटेल बंद

पुण्यामध्ये तुकाराम मुंढे यांच्या अन्न व औषध प्रशासनाने मोठी कारवाई केली. एफडीएने पुण्यातील प्रसिद्ध हॉटेल वैशाली आणि रूपालीचे परवाने निलंबित केले. अन्न सुरक्षा नियमांचे गंभीर उल्लंघन केल्याप्रकरणी ही कारवाई करण्यात आली. स्वयंपाक घरातील अस्वच्छता, उघड्यावर अन्नपदार्थांची साठवणूक आणि अन्नसुरक्षेच्या नियमांकडे दुर्लक्ष केल्याचा ठपका ठेवण्यात आला आहे. एकाच वेळी पुणेकराच्या पसंतीच्या आणि प्रसिद्ध असलेल्या हॉटेल वैशाली आणि रुपालीवर कारवाई करण्यात आल्यामुळे पुण्यात खळबळ उडाली.

एफडीएच्या पथकाच्या तपासणीत हॉटेल वैशालीला ९८ पैकी केवळ ५८ गुण मिळाले. यापूर्वी नोटीस देऊनही त्रुटी कायम असल्याने वैशाली हॉटेलवर एफडीएने कारवाई केली. रूपाली रेस्टॉरंटमध्येही अस्वच्छता, अयोग्य अन्नसाठवणूक आणि आवश्यक कागदपत्रांचा अभाव दिसून आला. एफडीएकडून दोन्ही हॉटेल्सचे अन्न व्यवसाय परवाने तात्काळ प्रभावाने निलंबित करण्यात आले. परवाने पूर्ववत होईपर्यंत विक्री, पार्सल आणि होम डिलिव्हरीलाही बंदी घालण्यात आली आहे.

कारवाईदरम्यान वैशाली हॉटेलच्या स्वयंपाकघरात जागेची कमतरता असल्याने कच्चा माल ठेवण्यासाठीचा फ्रीजर महिलांच्या स्वच्छतागृहाच्या बाजूला ठेवण्यात आल्याचे दिसून आले. डोसा आणि उत्तप्पा तयार करण्याचा तवा पुरुषांच्या स्वच्छतागृहाच्या शेजारी होता. धुतलेली भांडीही स्वच्छतागृहासमोरील टेबलावर ठेवण्यात आल्याचे दिसून आले. उकडलेले बटाटे, शिजवलेला भात आणि अन्य अन्नपदार्थ उघड्या कॉरिडॉरमध्ये ठेवले होते. इडली आणि डोशाचे पीठ तयार करण्याची प्रक्रियाही असुरक्षित जागेत सुरू असल्याचे एफडीएच्या पथकाला दिसून आले.FDA

तर, रूपाली रेस्टॉरंटवर करण्यात आलेल्या कारवाईदरम्यान स्वयंपाकघर उघडे आणि असुरक्षित असल्याचे दिसून आले. रेस्टॉरंटमध्ये धूळ, घाण आणि कीटकांचा प्रवेश होण्याची शक्यता होती. रेस्टॉरंटच्या परिसरात पाणी साचणे, अस्वच्छता आणि कचऱ्याचे अयोग्य व्यवस्थापन या त्रुटी कारवाईत आढळल्या. कच्चा माल, अर्धप्रक्रियायुक्त आणि तयार अन्नपदार्थ योग्य प्रकारे झाकून ठेवलेले नसल्याचे दिसून आले. तसेच त्यावर लेबल आणि वापरण्याची अंतिम तारीख नमूद केलेली नव्हती. या सर्व गोष्टी आढळून आल्यानंतर एफडीएने कारवाई केली. हॉटेल वैशाली आणि रुपाली रेस्टॉरेंटच्या बाहेर बंद अशी पाटी लावण्यात आली आहे. पुण्यातील एफ.सी. रोडवर हे दोन्ही प्रसिद्ध हॉटेल्स आहेत. यावर कारवाई करण्यात आल्यामुळे पुणेकरांमध्ये चर्चा होत आहे.