चालत्या ट्रेनमधून घाईघाईत उतरताना तसेच स्टंट करताना अपघात घडण्याची घटना नवीन नाही. मात्र पती शेजारी न दिसल्याने चक्क महिलेने चालत्या ट्रेनमधून उडी मारण्याचा धक्कादायक प्रकार कर्जत स्थानकात घडला. कर्जत स्थानकातुन पती व पत्नी प्रवास करत असताना पती बाजूला न दिसल्याने अस्वस्थ झालेल्या महिलेने पतीला शोधण्यासाठी धावत्या ट्रेन मधून उडी मारण्याचा प्रयत्न केला. परंतु प्लॅटफॉर्मवर उपस्थित असलेल्या रेल्वे पोलिसांच्या तत्परतेमुळे महिलेचे प्राण वाचले आहे.
खोपोली शास्त्रीनगर येथे राहणारे सुनैना अखिलेश यादव व पती अखिलेश यादव हे दोघे पती पत्नी कामानिमित्त जाण्यासाठी कर्जत रेल्वे स्थानकावर आले होते. त्यानंतर त्यांनी खोपोलीकडे जाणारी ३ च्या सुमाराची ट्रेन कर्जत रेल्वे स्थानकात फलाटक्रमांक दोनवर पकडली. मात्र ट्रेन सुरू झाल्यानंतर पती अखिलेश यादव हे पत्नीला न सांगताच स्थानकात उतरले.
ट्रेन सुरु झाल्यानंतर बराच वेळ शोधून पती आजूबाजूला दिसत नसल्याने अस्वस्थ झालेल्या सुनैना यांनी कसलाही विचार न करता धावत्या गाडीतून उडी मारली. महिलेला उडी मारताना पाहून रेल्वे स्थानकावर उपस्थित असलेल्या रेल्वे पोलिसांनी प्रसंगावधान दाखवत महिलेला ट्रेन खाली जाण्याआधीच प्लॅटफॉर्मवर खेचले.
गोपनीय शाखेचे पोलीस हवालदार राजेंद्र मोतीलाल बागुल असे या कर्तृत्ववान पोलिसांचे नाव असून 'सद्रक्षणाय खलनिग्रहणाय' या ब्रिदवाक्य खरे केले आहे. दरम्यान या महिलेचे प्राण वाचले असून तिची प्रकृती ठीक असल्याचे म्हटले जात आहे. वारंवार पोलिसांनी आवाहन करूनही धावत्या ट्रेनमध्ये स्टंट करणाऱ्यांची संख्या काही कमी नाहीच.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.