Shaniwar Wada Namaz Row : भाजप खासदार मेधा कुलकर्णींना अटक होणार? पुण्यातील शनिवारवाडा प्रकरण तापलं

शनिवारवाड्यात मुस्लिम महिलांनी नमाज पठण केल्याने नव्या वादाला तोंड फुटलं आहे. या नमाज पठणाला विरोध करत भाजप खासदार मेधा कुलकर्णी यांनी आंदोलन केलं. खासदार मेधा कुलकर्णींच्या भूमिकेला अजित पवार गटाच्या रुपाली ठोंबरे यांनी जोरदार विरोध केला. भाजप खासदार मेधा कुलकर्णी यांच्या विरोधात आंदोलन करत त्यांच्या अटकेची मागणी केली. या शनिवारवाडा प्रकरणावरून पुण्यातील राजकीय वातावरण तापलं आहे.

शनिवारवाडा प्रकरणावरून महायुतीत वाद पेटला आहे. शनिवारवाड्यात नमाज पठण झाल्याचा आरोप करत आणि शनिवारवाड्याच्या परिसरातील कबर काढा, या मागण्यांसाठी मेधा कुलकर्णी यांनी हिंदुत्ववादी संघटनासह या शनिवारवाडा परिसरात आंदोलन केलं होतं. भाजप खासदार मेधा कुलकर्णी यांच्या आंदोलनानंतर अजित पवार गटाच्या महिला नेत्या रुपाली ठोंबरे मैदानात उतरल्या. मेधा कुलकर्णी यांच्या आंदोलनाला प्रत्युत्तर देण्यासाठी राष्ट्रवादी काँग्रेसच्या रुपाली ठोंबरे यांनी कार्यकर्त्यांसह शनिवारवाड्यात आंदोलन केलं.

कुलकर्णी यांच्यावर महायुतीमधील राष्ट्रवादी काँग्रेस पक्षाच्या प्रवक्त्या रूपाली ठोंबरे यांनी सडेतोड टीका केली. मेधा कुलकर्णी या पर्सनल अजेंडा राबवतात आणि त्यांना नौटंकी करायची सवय आहे. कुलकर्णी या भाजपाच्या असल्यामुळे भाजपच्या नेत्यांनी त्यांना थांबवायला पाहिजे. कारण त्या शिक्षिका आहेत. त्यांची डिग्री तपासावी लागेल,असं सुद्धा रूपाली ठोंबरे म्हणाल्या. यावेळी आंदोलकांनी मेधा कुलकर्णी मुर्दाबाद, मेधा कुलकर्णींवर गुन्हा दाखल करून अटक करा, अशी घोषणाबाजी केली. ठोंबरे यांच्या मागणीनंतर मेधा कुलकर्णींना अटक होणार का, हे पाहावे लागेल.

रिपाईं नेते खासदार कुलकर्णींविरोधात आक्रमक

रिपब्लिकन पार्टी ऑफ इंडियाचे नेते सचिन खरात यांनी म्हटलं की, खासदार मेधा कुलकर्णी नमाज पठणाने तुमच्या धार्मिक भावना दुखावल्या. मग शनिवारवाड्यामध्ये मस्तानी दरवाजा आहे. त्यामुळे तुमच्या धार्मिक भावना दुखत नाही का? त्याचे काय करणार, असा प्रश्न रिपब्लिकन पार्टी ऑफ इंडिया खरात गटाचे अध्यक्ष सचिन खरात यांनी उपस्थित केला. बाजीराव आणि मस्तानी यांना शमशेर नावाचा मुलगा होता. मग तुम्हाला बाजीराव चालतात मग शमशेरबद्दल तुमचं मत काय आहे, असा प्रश्न खरात यांनी उपस्थित केला.