आताची सर्वात मोठी बातमी! सातारा राड्यावरून एकनाथ शिंदे नाराज; मंत्री आणि आमदारांकडून राजीनाम्याचा इशारा

सूरज मसूरकर, साम टीव्ही

विधीमंडळात महायुतीतच खडाजंगी पाहायला मिळत आहे. विधानपरिषदेत सातारा राड्यावरून मंत्री जयकुमार गोरे आणि शंभुराज देसाई एकमेकांना भिडल्याचे पाहायला मिळाले. जिल्हा परिषदेच्या अध्यक्ष आणि उपाध्यक्ष निवडीच्या वेळी दुखापत झाल्याची तक्रार मंत्री शंभुराज देसाई यांनी केली. त्यानंतर उपसभापती नीलम गोऱ्हे यांनी पोलीस अधीक्षकांच्या निलंबनाचे निर्देश दिले. याच राड्यावरून उपमुख्यमंत्री एकनाथ शिंदे यांनी संताप व्यक्त केला. साताऱ्यातील घटनेवरून महायुतीत नाराजीनाट्य पाहायला मिळत असून शिंदेंच्या मंत्री आणि आमदारांनी राजीनाम्याचा इशारा दिल्याची माहिती समोर आली आहे.

साताऱ्यातील जिल्हा परिषदेच्या अध्यक्ष आणि उपाध्यक्ष निवडीच्या दिवशी झालेल्या राड्यावरून शिंदेसेनेने आक्रमक भूमिका घेतली आहे. शिंदेंच्या आमदार आणि मंत्र्यांनी विधानपरिषदेत नाराजी व्यक्त केली. यावेळी उपमुख्यमंत्री एकनाथ शिंदे यांनीही सभागृहात संताप व्यक्त केला. त्यानंतर शिंदेंच्या आमदारांची तातडीची बैठक झाली. या बैठकीत मंत्री आणि आमदारांना मिळणारी वागणूक दुय्यम असल्याचा आरोप करत नाराजी व्यक्त करण्यात आली. उपमुख्यमंत्र्यांच्या दालनात झालेल्या बैठकीत शिंदेंच्या आमदारांचा आक्रमक पवित्रा पाहायला मिळाला.

नेमकं काय घडलं?

विधीमंडळात उपसभापती नीलम गोऱ्हे यांनी सातारा पोलीस अधीक्षकांच्या निलंबनाचे निर्देश दिले. त्यानंतर वेगवान घडामोडी घडायला सुरूवात झाली. मंत्री चंद्रशेखर बावनकुळे आणि उपमुख्यमंत्री एकनाथ शिंदे यांच्या भेटीसाठी पोहोचले. त्याआधी उपमुख्यमंत्र्यांच्या दालनात शिवसेनेच्या मंत्री आणि आमदारांची एक बैठक झाली.

या बैठकीत त्यांनी उघड नाराजी व्यक्त केली. सातारा राडा प्रकरणी कोणतीही कारवाई झाली नाही, तर आम्ही सर्व मंत्री आणि आमदार राजीनामा देऊ, असा इशारा त्यांनी दिला. महायुतीत वारंवार शिंदेसेनेला दुय्यम वागणूक मिळत आहे. रायगड आणि साताऱ्याची उदाहरणे देण्यात आली. आता भविष्यात अशी पुनरावृत्ती होऊ नये. यावर ठोस भूमिका मांडली पाहिजे . या प्रकरणी एकनाथ शिंदे यांनीही नाराजी व्यक्त केली.