Vidyanand Bapat Video: पुण्यात टिळक रोडवर मोठा गोंधळ! विद्यानंद बापटांना बेदम मारहाण, व्हिडिओ व्हायरल

सागर आव्हाड, पुणे प्रतिनिधी

Vidyanand Bapat assaulted on Tilak Road Pune : गणेशोत्सवात वाजवल्या जाणाऱ्या डीजेविरोधात आवाज उठवणारे विद्यानंद बापट यांना ऑन कॅमेरा मारहाण झाल्याची धक्कादायक घटना पुण्यात घडली. पुण्यातील अत्यंत गजबजलेल्या टिळक रोडवर हा प्रकार घडला. या घटनेमुळे शहरात एकच खळबळ उडाली आहे.

मिळालेल्या प्राथमिक माहितीनुसार, विद्यानंद बापट हे टिळक रोड परिसरात गणेशोत्सवातील डीजे आणि आवाजाच्या त्रासाबाबत प्रत्यक्ष नागरिकांच्या प्रतिक्रिया जाणून घेत होते. यावेळी स्थानिक एका गणेश मंडळाच्या कार्यकर्त्यांसोबत त्यांची बाचाबाची झाली. वाद वाढल्याने संतप्त झालेल्या कार्यकर्त्यांनी विद्यानंद बापट यांना भरचौकात बेदम मारहाण केली.

डीजेच्या दणधणाटाविरोधात सातत्याने आवाज उठवल्यामुळेच विद्यानंद बापट हे गणेश मंडळांच्या निशाण्यावर होते, असं सांगण्यात येत आहे. या घटनेनंतर परिसरात काही काळ तणावाचे वातावरण निर्माण झाले होते. घटनेची माहिती मिळताच पोलिसांनी घटनास्थळी धाव घेतली असून, मारहाण करणाऱ्या कार्यकर्त्यांचा शोध सुरू केला आहे.

तो चुकीचं बोलतो, त्याला मारायलाच पाहिजे होतं

पुण्यात डीजे आणि ध्वनीप्रदूषणाविरोधात आवाज उठवणारे विद्याधर बापट यांना भरचौकात झालेल्या मारहाण प्रकरणात आता एका कार्यकर्त्याची धक्कादायक भूमिका समोर आली आहे. "तो गणेशोत्सवाबद्दल चुकीचं बोलत होता, त्यामुळे त्याला मारायलाच पाहिजे होतं," असं समर्थन मारहाण करणाऱ्या कार्यकर्त्यानं केलं आहे. 'साम टीव्ही' या वृत्तवाहिनीशी बोलताना त्याने ही प्रतिक्रिया दिली.

संबंधित कार्यकर्त्याने बोलताना पुढे म्हटलं की, "पुण्यात फक्त गणेशोत्सव आहे का? जो कोणी गणेशोत्सवाच्या विरोधात बोलेल, त्याला असंच कानशिलात मारणार आणि धडा शिकवणार!"