Pune news : पुण्यात दहशतवादी हल्ला होण्याची शक्यता; पोलिसांनी घेतला मोठा निर्णय, वाचा

सागर आव्हाड, साम टीव्ही

भारत आणि पाकिस्तानमधील तणाव वाढल्याने मुंबईपाठोपाठ पुण्यात अलर्ट घोषित करण्यात आला आहे. भारतीय सैन्याच्या ऑपरेशन सिंदूरच्या कारवाईनंतर पुण्यात दहशतवादी संघटनांकडून हल्ला करण्याची शक्यता नाकारता येत नाही. त्यामुळे पोलिसांनी मोठी खबरदारी घेतली आहे. पुणे पोलिसांनी शहरात ड्रोन, पॅराग्लायडिंग, एअरक्राफ्ट, हॉट एअर बलूनला बंदी घातली आहे.

दहशतवादी हल्ल्याच्या अनुषंगाने पोलिसांकडून मोठी खबरदारी ठेवण्यात येत आहे. दहशतवादी हल्ल्याच्या पार्श्वभूमीवर खबरदारी शहरात ड्रोन, रिमोट कंट्रोल, मायको-लाइट, एअरक्राफ्ट, पॅराग्लायडर, पॅरामोटर, हॅन्डग्लायडर, हॉटएअर, हॉटएअर बलूनच्या उड्डाणास पोलिस प्रशासनाने बंदी घातली आहे. सुरक्षेच्या दृष्टिकोनातून पुढील तीस दिवस म्हणजेच १२ जूनपर्यंत ही बंदी असणार आहे. कायदा आणि सुव्यवस्थेच्या अनुषंगाने पोलिस सहआयुक्त रंजन कुमार शर्मा यांनी याबाबतचे आदेश काढले आहेत.

मुंबईतही हायअलर्ट

भारत-पाकिस्तान तणावाच्या पार्श्वभूमीवर मुंबईतही हायअलर्ट घोषित करण्यात आलाय. ऑपरेशन सिंदूरनंतर देशातील महत्त्वाच्या ठिकाणांवर अलर्ट जारी करण्यात आलाय. पाकिस्तानने जम्मू, राजस्थान, पंजाब या भागात हल्ले केले आहेत. ऑपरेशन सिंदूरदरम्यान काही ब्लॅकआउट देखील करण्यात आले होते. ऑपरेशनदरम्यान पाकिस्तानच्या हल्ल्यांना भारताकडून चोख प्रत्त्युत्तर देण्यात आलं.

भारताने लाहोर, कराची आणि इस्लामाबादमध्ये ड्रोन हल्ले केले. त्यामुळे मुंबईवरही हल्ला होण्याची शक्यता वर्तवण्यात येत आहे. मुंबई पोलिसांच्या सर्व सुट्ट्या रद्द करण्यात असून धार्मिक आणि पर्यटन स्थळांवर हायअलर्ट आहे. ऑपरेशन सिंदूरनंतर महाराष्ट्रातील महत्त्वाच्या ठिकाणी सुरक्षा यंत्रणा सक्रीय झाल्या आहेत.