Pune : काळजाचा थरकाप! पुण्यात २४ तासांत ८ जणांचा संशयास्पद मृत्यू; दोन सख्ख्या भावांचाही समावेश

गोपाल मोटघरे, पिंपरी चिंचवड प्रतिनिधी

8 people died suspiciously in Pune : पिंपरी-चिंचवडमधील पिंपळे गुरव आणि फुगेवाडी परिसरावर गेल्या दोन दिवसांपासून जणू मृत्यूचे सावट पसरले आहे. मंगळवारी रात्रीपासून सुरू झालेल्या दुर्दैवी घटनांच्या सत्रामुळे अवघ्या काही तासांत आठ जणांना आपला जीव गमवावा लागला आहे. २ जणांची प्रकृती अतिशय गंभीर असल्याची माहिती समोर आली आहे. एकापाठोपाठ झालेल्या या मृत्यूंमुळे संपूर्ण परिसर शोकसागरात बुडाला असून नागरिकांमध्ये कमालीचा धक्का आणि भीतीचे वातावरण आहे.

सध्या पोलीस आणि स्थानिक प्रशासन या मृत्यूंमागच्या कारणांचा शोध घेत असून, परिसरात शांतता राखण्याचे आवाहन करण्यात आले आहे. या सामूहिक मृत्यूंमागे अवैध आणि बंदी असलेली हातभट्टीची गावठी (विषारी दारू) कारणीभूत असल्याचा थेट आरोप स्थानिक नागरिकांनी केला आहे.

मृतांची नावे-

१) पाडुरंग फुगे

२) विजय प्रकाश राठोड

३) राजेंद्र प्रकाश राठोड

४) राजू रजपुत

५) अकबर पठाण

६) बाबा शेख

७) आनंद देसाई

८) आनंद निकाळजे

या दोघांची प्रकृती चिंताजनक

१) सुभाष डिगीकर - मेडी पाॅईट हॉस्पिटल

२) अक्षय अवसरमल - यशवंतराव चव्हाण हॉस्पिटल

फुगेवाडी परिसरातील आनंदवन, काटे वस्ती, संजयनगर, आझाद चौक आणि जय महाराष्ट्र चौक या भागांतील घराघरांतून सध्या केवळ आक्रोश आणि हंबरडे ऐकू येत आहेत. कालपर्यंत आपल्यात हसणाऱ्या-वावरणाऱ्या व्यक्ती अचानक डोळ्यांदेखत निघून गेल्याने स्थानिक रहिवाशांना या धक्क्यातून सावरणे कठीण झाले आहे. या अकल्पित घटनांमुळे अनेक हसतीखेळती कुटुंबे उद्ध्वस्त झाली आहेत.

या संपूर्ण दुर्घटनेत फुगेवाडी येथील राठोड कुटुंबावर कोसळलेला दुःखाचा डोंगर सर्वात मोठा आणि मन सुन्न करणारा आहे. विजय राठोड (वय ३१) आणि राजेंद्र राठोड (वय ३४) या दोन सख्ख्या भावांना काळाने एकाच वेळी कवेत घेतले. तळहाताच्या फोडाप्रमाणे जपलेल्या आपल्या दोन्ही तरुण मुलांना एकाच वेळी गमावल्याने त्यांच्या वृद्ध आईचा आक्रोश काळजाचा थरकाप उडवणारा आहे. या दोन्ही भावांच्या मृत्यूमुळे संपूर्ण परिसरातून हळहळ व्यक्त होत आहे.