पुण्यात मध्यरात्री भीषण अपघाताचा थरार; भरधाव कार १७० ते २०० फूट खोल दरीत कोसळली

पुण्यातील राजगड तालुक्यात मध्यरात्री भीषण अपघात

भरधाव कार १७० ते २०० फूट खोल दरीत कोसळली

कारमधील दोन जण गंभीर जखमी

सचिन जाधव, साम टीव्ही

पुण्यात मध्यरात्री भीषण अपघाताची घटना घडली आहे. राजगड तालुक्यातील पाबे घाटात मध्यरात्रीच्या सुमारास कार सुमारे १७० ते २०० फूट खोल दरीत कोसळल्याने अपघात झाल्याची घटना घडली. या अपघातात दोघे जण गंभीर जखमी झाले आहेत. सुदैवाने यात जीवितहानी झालेली नाही.

राजगडमध्ये मध्यरात्री दोनच्या सुमारास घाट चढत असताना एका तीव्र वळणावर, चालकाला वळणाचा अंदाज आला नाही. त्यानंतर चालकाचे कारवरील नियंत्रण सुटून कार थेट खोल दरीत कोसळून हा अपघात झाला. सुदैवाने यात जीवितहानी झाली नाही. दुर्घटनेत दोघेजण गंभीर जखमी झाले आहेत. शुभम सचिन अजेटराव आणि अमित सचिन अजेटराव अशी जखमी असलेल्या दोघांची नाव आहेत.

शुभम सचिन अजेटराव आणि अमित सचिन अजेटराव हे कारने रात्री उशिरा वेल्हेहून पाबे खिंडी मार्गे पुण्याकडे निघाले होते. मध्यरात्री दोनच्या सुमारास घाट चढत असताना एका तीव्र वळणावर चालकाचे नियंत्रण सुटल्याने मोटार थेट खोल दरीत कोसळून हा अपघात झालाय.

अपघाताची माहिती मिळताच वेल्हे पोलिस ठाण्याचे कर्मचारी आकाश पाटील यांनी तत्काळ आपत्ती व्यवस्थापन विभागाला कळवलं. त्यानंतर पोलीस आणि आपत्ती व्यवस्थापन पथकाने घटनास्थळी धाव घेत तातडीने बचावकार्य सुरू केलं. दरीत अडकलेल्या जखमींना मोठ्या प्रयत्नांनी स्ट्रेचरच्या साह्याने बाहेर काढून जवळच्या रुग्णालयात उपचारासाठी पाठवले.

दरीत कार कोसळल्याने कारचे मोठं नुकसान झालं आहे. कारचा चेंदामेंदा झाला आहे. मध्य रात्री ही कार एका झाडाला धडकली. एकाच जागेवर थांबली. त्यामुळे कारमधील लोकांचा वाचला असावा, अशी शक्यता व्यक्त केली जात आहे.