Pune : पुण्यात सैराट! फोन करून बोलावलं, जीव जाईपर्यंत मारलं; प्रेमप्रकरणातून तरुणाची हत्या

सागर आव्हाड, पुणे

पुण्यात प्रेम प्रकरणातून प्रेयसीच्या कुटुंबीयांनी तरुणाला घरी बोलवून त्याची हत्या केल्याची धक्कादायक घटना समोर आली आहे. याप्रकरणी तरुणाच्या कुटुंबीयांनी पोलीस ठाण्यात तक्रार दाखल केली असून पोलिसांनी १० जणांविरोधात गुन्हा दाखल केला आहे. याप्रकरणी पोलीस अधिक तपास करत आहेत.

मिळालेल्या माहितीनुसार, मृत तरुणाचे नाव नागेश जाधव (वय २३) असे आहे. नागेश हा पुण्यातील शिवाजीनगर येथे ऑफिस बॉय म्हणून काम करत होता. त्याची आई घरकाम करते. १४ मार्च रोजी सायंकाळच्या सुमारास नागेशला एक फोन आला. त्यानंतर तो तातडीने घरातून दुचाकी घेऊन निघाला. त्यानंतर रात्री ८ च्या सुमारास नागेशच्या फोनवरून एका व्यक्तीने त्याच्या आईला फोन करून शिवीगाळ केली. तसेच आम्ही नागेशला मारलं असून त्याला घेऊन जा नाहीतर फेकून देऊ अशी धमकी दिली.

पीडित मुलाच्या कुटुंबीयायांनी घटनास्थळी धाव घेतली. यावेळेस तिथे तरुणाला बेदम मारहाण करत होते. पीडित मुलाच्या कुटुंबीयांनी तातडीने त्याला रुग्णालयात नेले. यावेळेस नागेशच्या आईने त्याला नेमकं काय घडलं विचारले असता, त्याने सांगितले की त्याच्या प्रेयसीच्या कुटुंबीयांनी तिच्या नंबरवरून नागेशला मेसेज करून बोलावून घेतलं. त्यानंतर त्याला बेदम मारहाण केली.

नागेशला उपचारासाठी रुग्णालयात घेऊन जाण्यात आले, मात्र उपचारादरम्यान त्याचा मृत्यू झाला. याप्रकरणी मृत तरुणाच्या आईने पोलीस ठाण्यात संबंधित मुलीच्या कुटुंबीयांविरोधात तक्रार दाखल केली आहे. याघटनेने पुण्यात खळबळ उडाली आहे.