Pune Corporation Election: पुण्यात काँग्रेसच्या हातात मशाल; काँग्रेस-ठाकरे सेनेचं जागावाटप जाहीर

पुण्यात दोन्ही राष्ट्रवादी एकत्र आल्यानं महाविकास आघाडीत फूट पडली. तर दुसरीकडे काँग्रेस आणि ठाकरेसेनेनं पुण्यात युतीची घोषणा केलीय. एवढंच नव्हे तर काँग्रेस आणि ठाकरेसेनेनं जागा वाटपाचा फॉर्म्युलाही जाहीर केलाय.

खरंतर दोन्ही राष्ट्रवादी एकत्र येण्याची चर्चा सुरु असल्यानं ठाकरेसेना आणि काँग्रेसनं आपापसात बोलणी सुरु केली होती. या चर्चेत मनसेही सहभागी झाली होती. मात्र मनसेला अपेक्षित जागा मिळाल्या नसल्यानं मनसेनं काँग्रेस आणि ठाकरेसेनेच्या युतीतून बाहेर पडण्याचा निर्णय घेतला. मात्र कोणत्या पक्षाला किती जागा देण्यात आल्या आहेत. पाहूयात.

पुणे महापालिकेत ठाकरेसेनेला 45, काँग्रेसला 60 जागा देण्यात आल्या आहेत.मात्र मनसेनं 32 जागांची मागणी केली होती. त्यापैकी ठाकरेसेनेनं 21 जागाच दिल्या. त्यामुळे मनसेनं युतीतून बाहेर पडण्याचा निर्णय घेतलाय. हे असं असलं तरी ठाकरेसेना मात्र मनसेला सोबत घेण्यासाठी प्रयत्नशील असल्याची माहिती ठाकरेसेनेनं दिलीय.

खरंतर 2017 मध्ये पुणे महापालिकेत शिवसेनेला 10 तर काँग्रेसला 9 जागांवर विजय मिळाला होता. आता शिवसेनेत फूट पडलीय. त्यानंतरही पुण्यातील कोथरुड, हडपसर, पर्वती, दत्तवाडी आणि वडगाव शेरीत ठाकरेसेनेचा प्रभाव आहेत. तर कसबा पेठ, पुणे कॅन्टोन्मेंट, शिवाजीनगर आणि मध्यवस्तीत काँग्रेसचा प्रभाव आहे. आता पुण्यात भाजप आणि अजित पवारांची राष्ट्रवादी वेगवेगळे लढत असताना काँग्रेस आणि ठाकरेसेनेनं एकीचा नारा दिलाय.. त्यामुळे महायुतीतील मतांमध्ये फूट पडली असताना काँग्रेस आणि ठाकरेसेनेचं एकीचं बळ महायुतीला रोखण्यात यशस्वी होणार का? आणि पुणेकर काँग्रेस आणि ठाकरेसेनेला स्वीकारणार का? याकडे राज्याचं लक्ष लागलंय.