Pune Puma Clothes Fraud : तुम्ही घातलेले 'पुमा'चे कपडे बनावट? पुण्यातून धक्कादायक प्रकार उघडकीस

पुण्यातील आंबेगाव परिसरात कॉपीराईट कायद्याचा भंग करणाऱ्या बनावट वस्तूंच्या विक्रीचा एक प्रकार उघडकीस आला असून, पोलिसांनी मोठ्या प्रमाणात बनावट माल जप्त करून गुन्हा दाखल केला आहे. ही कारवाई आंबेगाव येथील स्टायलॉक्स फॅशन शॉपवर करण्यात आली. या दुकानातून ‘पुमा’ कंपनीचे नाव आणि लोगो वापरून बनावट टी-शर्ट, बूट, चप्पल आणि ट्रॅक पॅन्टची विक्री केली जात होती. पोलिसांनी या दुकानावर छापा टाकत मुद्देमाल जप्त केला आहे.

मिळालेल्या माहितीनुसार ‘पुमा’ कंपनीच्या अधिकृत प्रतिनिधींना आंबेगाव परिसरातील एका दुकानामध्ये त्यांच्या कंपनीच्या नावाचा आणि लोगोचा वापर करून बनावट मालाची विक्री सुरू आहे, अशी माहिती मिळाली होती. ही माहिती मिळताच त्यांनी थेट पोलिसांकडे तक्रार नोंदवली. तक्रारीच्या आधारे आंबेगाव पोलीस ठाण्याच्या पथकाने छापा टाकून मोठ्या प्रमाणावर बनावट वस्तू जप्त केल्या.

पोलिस तपासात समोर आले की, या दुकानात २ लाख ३२ हजार रुपये किंमतीचे २९० टी-शर्ट, २ लाख ४९ हजार रुपये किंमतीचे ५९ बूट, तसेच २ लाख ३७ हजार रुपये किंमतीचे १९८ पॅन्ट अशा एकूण ८ लाख १३ हजार ७५० रुपयांच्या वस्तू विक्रीसाठी मांडण्यात आल्या होत्या. या सर्व वस्तूंवर ‘पुमा’ कंपनीचा लोगो आणि नाव छापलेले होते, मात्र त्या अधिकृत उत्पादन नव्हत्या.

या कारवाईनंतर दुकान मालक शिवम लालबाबु गुप्ता याच्याविरुद्ध आंबेगाव पोलीस ठाण्यात कॉपीराईट कायद्यांतर्गत गुन्हा दाखल करण्यात आला आहे. पोलिसांनी सांगितले की, अशा प्रकारे बनावट ब्रँडेड वस्तूंची विक्री करणे हा केवळ ग्राहकांची फसवणूक नाही, तर कंपनीच्या बौद्धिक संपदेवर थेट आघात आहे.

सध्या या प्रकरणाचा अधिक तपास सुरू असून, या बनावट मालाचा पुरवठा करणाऱ्या स्रोतांपर्यंत पोहोचण्यासाठी पोलिस प्रयत्न करत आहेत. ग्राहकांनीसुद्धा अशा खोट्या ब्रँडेड वस्तूंच्या खरेदीपासून सावध राहावे, असे आवाहन पोलिसांकडून करण्यात आले आहे. या कारवाईनंतर आंबेगाव परिसरातील व्यापाऱ्यांमध्ये आणि ग्राहकांमध्ये एकच चर्चा सुरू आहे की, ब्रँडेड नावाखाली विकल्या जाणाऱ्या वस्तू खऱ्या आहेत की बनावट, हे तपासूनच खरेदी करणे गरजेचे आहे.