पुण्यात भरधाव कारचा थरार; ६ दुचाकींसह रिक्षाला उडवले, ४ वर्षांच्या मुलाचा मृत्यू

सचिन जाधव, साम टीव्ही

पुण्यातील खडकवासला गावात एका भरधाव कारने भीषण अपघात केल्याची धक्कादायक घटना घडलीये. बेजबाबदार चालकाने कार भरधाव वेगाने चालवून ६ दुचाकी आणि एका रिक्षाला जोरदार धडक दिली. रस्त्यावरील भीषण अपघातात एका ४ वर्षीय चिमुरड्याचा दुर्दैवी मृत्यू झाला आहे. तर ३ ते ४ जण गंभीर जखमी झाले आहेत..

मिळालेल्या माहितीनुसार, पुण्यातील खडकवासला गावात काल सायंकाळी ५:३० वाजण्याच्या सुमारास हा अपघात झाला. यशराज निलेश कांबळे असे या अपघातात मृत्यू झालेल्या बालकाचे नाव आहे.

कारमधील प्रवासी खडकवासला धरण भागाकडे निघाले होते. खडकवासलाच्या धरणाकडे जाताना सायंकाळी साडेपाचच्या सुमारास चालकाचं कारवरील नियंत्रण सुटलं. त्यानंतर कार रस्त्यावरील ६ दुचाकी वाहनांना आणि एका रिक्षाला धडक दिली. या वाहनांना धडक दिल्यानंतर कार रस्त्याच्या विरुद्ध बाजूच्या दुकानात घुसली. या भीषण अपघातामुळे दुचाकी वाहनांचे आणि रिक्षाचे प्रचंड नुकसान झालंय. अपघातात ३ ते ४ नागरिक गंभीर जखमी झालेत.

या अपघातात गंभीर जखमी झालेल्या ४ वर्षांच्या यशराज कांबळे याला तातडीने सिंहगड रोडवरील जगताप हॉस्पिटलमध्ये उपचारासाठी दाखल करण्यात आलं. मात्र, उपचार सुरू असतानाच यशराजने सायंकाळी ६:४० वाजण्याच्या सुमारास जीव सोडला.

या अपघातानंतर पोलिसांनी कार चालक अमोल गोरक्षनाथ गेगडे (वय ३२) आणि त्याचा साथीदार प्रकाश तात्याराम कोठारे (वय ३२) या दोघांना ताब्यात घेतलंय. दोघांची वैद्यकीय तपासणी करण्यासाठी त्यांना पुण्यातील ससून हॉस्पिटलमध्ये पाठवण्यात आलंय.

घटनेची माहिती मिळताच पोलिसांनी तातडीने घटनास्थळी धाव घेतली. पोलिसांनी घटनास्थळाचा पंचनामा केला आहे. पोलिसांनी आरोपी चालकाविरुद्ध गुन्हा दाखल करण्याची कारवाई सुरू केली. पुढील तपास नांदेड पोलीस स्टेशनचे वरिष्ठ पोलीस निरीक्षक अतुल भोस यांच्या मार्गदर्शनाखाली करण्यात येत आहे