NEET paper leak: 'मनी'साठी मनिषांनी फोडला पेपर, पुण्यातील 3 मनिषांचा कारनामा उघड

नीट पेपरफुटी प्रकरणात सीबीआयनं आतापर्यंत 11 जणांना अटक केली असून या प्रकरणाचे पाळंमुळं पुण्यातच असल्याचं उघड झालंय. त्यामुळे सीबीआयनं आपला तपास पुण्याभोवतीच केंद्रीय केलाय. नीट परीक्षेचा पेपर फोडण्यामागे पुण्यातील तीन महिलांचा सहभाग असल्याचं समोर आलंय. महत्त्वाचं म्हणजे या तिन्ही महिलांची नावं मनिषाच आहे. या तीन महिला नेमक्या कोण आहे ते जाणून घेऊया

पहिली मनिषा वाघमारे

वैद्यकीय क्षेत्राशी निगडित असलेल्या विद्यार्थ्यांना किंबहुना डॉक्टरला NEET पेपर पुरवल्या प्रकरणी पुणे पोलिसांनी मनिषा वाघमारेला बिबेवाडी परिसरातून बेड्या ठोकल्या. पेशाने ब्युटिशन असलेली मनीषा वाघमारे ब्युटी पार्लर चालवायची.

दुसरी आहे मनिषा मांढरे

गेल्या 24 वर्षांपासून पुण्यातील मॉडर्न कॉलेजमध्ये बायोलॉजी शिकवणारी मनिषा मांढरे NTA ची सदस्य होती. पेपरफुटीचा पुरावा सापडू नये म्हणून मनिषा मांढरेनं सर्व प्रश्न पाठ करून घेतले होते. तीही सीबीआयच्या कोठडीत आहे.

तिसरी आहे मनिषा हवालदार

पुण्यातील सेठ हरिलाल सराफ प्रशालेची मुख्याध्यापिका होती. मनिषा हवालदारची NTAवर भौतिकशास्त्राची तज्ज्ञ म्हणून नियुक्ती केली होती. त्यामुळे NEET परीक्षेच्या प्रक्रियेत तिचा थेट सहभाग होता. हवालदारनं भौतिकशास्त्राचे प्रश्न फौडून मनिषा मांढरेला पुरवल्या उघड झालंय. त्यामुळे तिलाही सीबीआयनं अटक केलीय.

मनिषा वाघमारे आणि मनिषा मांढरे या दोघी एकाच इमारतीत राहत असल्याचं स्पष्ट झालंय. तर मनिषा हवालदारही त्यांच्याच परिसरात वास्तव्याला आहे. त्यामुळे या तिघी आधीपासूनच संपर्कात होत्या का ? त्यांनी केवळ यंदाच्याच नीटचा पेपर फोडलाय की आधीही अशा कृत्यांमध्ये त्यांचा सहभाग आहे याचाही तपास करणं गरजेचं आहे. एकीकडे विद्यार्थी रात्रीचा दिवस करून 'नीट' परीक्षेची तयारी करतात. मात्र, पुण्यातील या तिन्ही 'मनिषां'नी पैशांच्या मोहासाठी लाखो विद्यार्थ्यांच्या नीट उत्तीर्ण होण्याच्या मनिषेला सुरूंग लावलाय आणि त्यांची स्वप्न उद्ध्वस्त केली आहेत.