Mumbai News: मुंबई पोलीस अॅक्शन मोडमध्ये; भाडे नाकारणाऱ्या रिक्षा,टॅक्सी चालकांचा परवाना होणार रद्द

सचिन गाड

Mumbai News: वारंवार भाडे नाकारणाऱ्या ऑटो रिक्षा/टॅक्सी चालकांची आता खैर नाही. भाडे नाकारणाऱ्या रिक्षा, टॅक्सी चालकांवर मुंबई पोलिसांनी मोठी कारवाई सुरू केली आहे. ऐन पावसाळ्यात भाडे नाकारल्याने प्रवाशांची मोठी गैरसोय होते. त्यामुळे आता मुंबई पोलिसांकडून भाडे नाकारणाऱ्या रिक्षा, टॅक्सी चालकांचा परवाना रद्द करण्यात येणार आहे. (Latest Marathi News)

वारंवार भाडे नाकारणाऱ्या ऑटो रिक्षा /टॅक्सी चालकांचा परवाना रद्द करण्यात येणार आहे. आता मुजोर रिक्षा, टॅक्सी चालकांवर मुंबई पोलिसांकडून कारवाई करण्यात येणार आहे. मुंबई पोलिसांकडून वारंवार भाडे नाकारणाऱ्या ऑटो रिक्षा/टॅक्सी चालकांचे परवाना जप्त करून निलंबित करण्यासाठीचे प्रस्ताव संबंधित परिवहन कार्यालयास पाठविण्यात येणार आहे.

मुंबई वाहतूक विभाग त्यांच्या विभागातील रिक्षा/टॅक्सी चालक यांच्या संघटनांशी संपर्क साधून बैठकीचे आयोजन करणार आहे. रिक्षा/टॅक्सी चालकांना प्रवाशांशी सौजन्याने वागावे, तसेच भाडे नाकारू नये अशा सूचना देण्यात येणार आहे.

भाडे नाकारू नये, अशा आशयाचे फलक रेल्वे स्थानक आणि बस स्थानक परिसरातील दर्शनी भागात लावण्यात येणार आहे. भाडे वाढण्यासाठी दूरच्या मार्गाचा वापर केल्यासही कारवाई होणार आहे.

गर्दीच्या ठिकाणी तसेच पर्यटन स्थळी रिक्षा / टॅक्सी चालकांकडून सर्रास भाडे नाकारले जातात. यामुळे अशा ठिकाणी अधिकारी व अंमलदार नेमून नियमित कारवाई करण्याच्या सूचना देण्यात आले आहे. काही गर्दीच्या ठिकाणांचा शोध घेऊन डमी ग्राहक पाठवून कारवाई करण्याचे आदेश देण्यात आले आहे.

तक्रारी प्राप्त झाल्यास संबंधित रिक्षा/टॅक्सी चालक यांच्यावर तात्काळ मोटार वाहन कायदा कलम १७८ (३) अन्वये कारवाई होणार आहे. आता भाडे नाकारणाऱ्या रिक्षा/टॅक्सी चालकांवर कारवाई होणार का, हे पाहावे लागणार आहे.