Accident : मीरा भाईंदरमध्ये हिट अँड रनचा थरार! मद्यधुंद चालकाचा हैदोस, धडकीत वाहनांचा चक्काचूर

मनोज तांबे, साम टीव्ही, प्रतिनिधी

मीरा भाईंदरच्या काशिमिरा परिसरामध्ये हिट अँड रनची थरारक घटना घडली आहे. भीषण अपघातामध्ये दोन चारचाकी वाहनांची टक्कर झाल्याची माहिती समोर आली आहे. या अपघातात अल्टो कारमध्ये असलेला तरुण मद्यधुंद अवस्थेत होता. या तरुणाला गंभीर दुखापत झाली आहे. या प्रकरणी पोलीस ठाण्यात गुन्हा दाखल करण्यात आला आहे.

रविवारी (२२ जून) मध्यरात्री एकच्या सुमारास दहिसरच्या दिशेकडून येणाऱ्या अल्टो कार भर वेगाने निघाली होती. या कारने एका चारचाकी कारला जोरदार धडक मारली. अल्टो कारचा चालक तरुण मद्यधुंद अवस्थेत असल्याची माहिती समोर आली आहे. ड्रिंक अँड ड्राईव्ह करत त्याने एका वाहनाला धडक दिली.

हा अपघात इतका भीषण होता की, अल्टो कारची दोन्ही चाके बाहेर निघाली. ही चाके पन्नास मीटरपेक्षा अधिक लांब फेकली गेली. याशिवाय दोन्ही चारचाकी वाहनांचा चक्काचूर देखील झाला. या भीषण अपघातामध्ये दोन जण गंभीर जखमी झाले असून त्यांच्यावर मिरारोडच्या भक्ती वेदांत रुग्णालयात उपचार सुरु आहेत. अपघाताप्रकरणी काशिमिरा पोलीस ठाण्यात गुन्हा दाखल करण्यात आला आहे.

वर्सोवा पुलावर तेलवाहू टँकर खाडीत पडला!

मुंबई-अहमदाबाद राष्ट्रीय महामार्गावरून ठाण्याच्या दिशेने निघालेला तेलाने भरलेला टँकर विरारजवळ खाडीत कोसळला. या अपघातानंतर सुरू करण्यात आलेल्या बचावकार्यादरम्यान एका व्यक्तीचा मृतदेह खाडीतून बाहेर काढण्यात आला आहे. यात आणखी कुणी अडकले आहे का यासाठी शोधकार्य सुरु आहे.