भाजपची ताकद वाढली; राऊतांचा शेकडो शिवसैनिकांसह प्रवेश, बदलापुरातील राजकीय समीकरण बदललं

मयुरेश कडव, साम टीव्ही

बदलापुरात शिवसेनेच्या शिंदे गटाला मोठा धक्का बसला आहे. शिंदेसेनेच्या बड्या नेत्याने शेकडो शिवसैनिकांसह भाजपमध्ये प्रवेश केला आहे. शिंदे गटाचे उपशहरप्रमुख असलेले प्रवीण राऊत यांनी भाजपमध्ये प्रवेश केला आहे. त्यांच्या भाजप प्रवेशामुळे शिंदे गटाचे ३ नगरसेवकही भाजपसोबत असणार आहेत.

बदलापूर नगरपालिकेची सत्ता काबीज केल्यानंतर भाजपने शिंदेसेनेचं टेन्शन आणखी वाढवलं आहे. शिंदेसेनेचे उपशहरप्रमुख प्रवीण राऊत यांच्यासह शेकडो शिवसैनिकांनी भाजपमध्ये पक्षप्रवेश केलाय. महत्वाचं म्हणजे प्रवीण राऊत यांची पत्नी शीतल राऊत आणि वहिनी विजया राऊत या शिवसेनेच्या नगरसेविका आहेत.

शिंदेंच्या शिवसेनेच्याच नगरसेविका दीपाली लामतुरे यांचे पती गणेश लामतुरे यांनीही शिवसेना सोडून भाजपचं कमळ हाती घेतलंय. त्यामुळे पालिकेत भाजपची ताकद वाढलीय.आता प्रवीण राऊत यांना भाजपकडून स्वीकृत नगरसेवकपद दिलं जाण्याची शक्यता आहे.

पंढरपुरात अजित पवार गटाला मोठा धक्का

पंढरपुरात राष्ट्रवादी काँग्रेस अजित पवार गटाला मोठा धक्का बसला आहे. भीमा साखर कारखान्याचे माजी उपाध्यक्ष कल्याणराव पाटील यांनी भाजपमध्ये प्रवेश केला आहे. ऐन जिल्हा परिषद निवडणुकीत राष्ट्रवादी काँग्रेसला पंढरपूरच्या पूर्वभागात खिंडार पडलं आहे. कल्याणराव‌ पाटील आणि त्यांच्या असंख्य कार्यकर्त्यांनी माजी आमदार प्रशांत परिचारक आणि यशवंत माने यांच्या उपस्थितीत भाजपमध्ये प्रवेश केला आहे.