सावधान, मुंबईसाठी पुढचे 3 तास महत्त्वाचे ! अतिमुसळधार पावसाचा इशारा; महापालिकेकडून हेल्पलाईन नंबर जारी

मुंबईत सकाळपासूनच पावसाचा जोर कायम आहे. दादर, माटुंगा, सायन, कुर्ला, घाटकोपर, विक्रोळी, भांडूप आणि मुलुंड परिसरात पावसाची तुफान बॅटिंग सुरू आहे. अजूनही : मुंबईकरांवरील पावसाचे संकट अजून टळलेले नाही, कारण हवामान विभागाकडून पुढचे तीन तास मुसळधार पावसाचा इशारा देण्यात आलाय. त्यामुळे नागरिकांनी योग्य ती खबरदारी घेण्याचे आवाहन करण्यात आले आहे. मुंबईच्या महापौर रितू तावडे यांनी पावसाबाबत महत्त्वाची माहिती देण्यात आली आहे.

मुंबईत आज सकाळपासून मुसळधार पाऊस कोसळत आहे. अनेक ठिकाणी पाणी साचले आहे. अनेक ठिकाणी झाडं कोसळल्याच्या घटना घडल्या आहेत. अंधेरी सबवेमध्ये सुमारे अडीच फुटांपर्यंत पाणी साचल्याने येथील वाहतुकीचा खोळंबा झालाय. वीरा देसाई रोडही पूर्णपणे पाण्याखाली गेलाय. गोरेगावच्या फिल्म सिटी रोड आणि संतोषनगर परिसरातील मुख्य रस्त्यांवर 2 ते 3 फुटांपर्यंत पाणी साचले आहे. अशात मुंबईसाठी नवीन इशारा हवामान विभागाने दिला आहे.

महापालिकेकडून हेल्पलाईन नंबर जारी

पुढील तीन तासात मुंबई शहर, मुंबई उपनगर, पालघर आणि ठाणे जिल्ह्यात काही ठिकाणी मुसळधार पाऊस होईल अशी शक्यता वर्तवण्यात येत आहे. पुढचे तीन तास पावसाचा रेड अलर्ट देण्यात आलाय. यासाठी दक्षता म्हणून आपात्कालीन नंबर जारी करण्यात आलाय. 196 हा आपात्कालीन कक्षाचा नंबर आहे. मुसळधार पाऊस पडत आहे, त्यामुळे काम असेल तरच बाहेर पडा, अशी सुचना महापौर रितू तावडे यांनी दिली आहे.

नवी मुंबईतील सानपाडा परिसरात रस्त्यांना नदीचे स्वरूप आले आहे. अनेक वाहने पाण्यात बुडाली आहेत. सायन-पनवेल हायवेवर पाणी साचल्याने मैलोन्मैल वाहनांच्या रांगा लागल्या आहेत. महामार्गावर मोठी वाहतूक कोंडी झाली आहे. रायगड जिल्ह्यात पावसाची संततधार सुरूच आहे.